Monday 31 December 2012

Misa Iha Igreija Bekora Joven Gas Motor PNTL Atua

Tempo Semanal - Dili, 31/12/2012

Igreija celebra misa ba troka tinan nakonu ho sarani sira maibe joven balun celebra ho hemu tua too lanu gas motor, PNTL simu hasoru.
Mais ou menus iha tuku 20.10, motor ida ne'ebe sa'e husi joven ida mak deskonfia lanu todan halo interompe sarani sira ne'ebe tuir misa iha igreija bekora tan ba halimar gas motor besik kedan igreija oin hodi hasai lian maka'as no PNTL ne'ebe halo seguranca besik fatin refere halo atuasaun hodi hapara maibe joven ne'e koko responde ho gas nafatin hodi halo Polisia trafiku ida seluk duni no kaptura joven  ne'e ho ninia motor la do'ok husi fatin ne'e.

"Ita bo'ot gangu ema misa i ita bo'ot ne'e la respeita ema misa hela gas motor hodi halai maka'as hanesan ne'e depois mai iha ne'e goza ema sarani," dehan PNTL ida ba joven refere.

Sarani wain tebes maka hola parte iha misa refere. Igreija laran nokonu, jardin igrieja ninian mos resin ate liuron bo'ot besik fatin akontecimentu ninian.

Wainhira polisia kaptura jovens ne'ebe halai motor ho velocidade maka'as besik igreija oin balun mos hakfodak tan ba joven ne'e koko atu halo atuasaun hasoru PNTL nune'e PNTL mos uza forca uitoan hodi hanehan nia ba rai no borgol hodi so'e sa'e ba kareta leten.

Ankontecimentu ne'e halo trafiku paradu uitoan no kareta ho motor nakselok kahor malu ho ema wain ne'ebe hahu sai husi misa.

Misa agradesimentu nba tinan 2012 no simu tinan foun 2013 hahu hala'o iha igreija sira iha kapital nasaun ninian. Maibe iha Igreija Bekora misa ne'ebe dirije hamutuk husi padre Leao ho Amo Parko Igreija Sagrado Korasaun de Jesus, padre Guelhermino ne'e hahu iha tuku 18.30 no remata iha tuku 20.20.

Padre Parko bekora iha ninia omilia husu atu sarani sira respeita sira nia moris. "Husu bo'ot atu sarani sira hala'o didi'ak sira nia vida nune'e bele kontribui bu'at di'ak ba sociedade no nasaun," dehan amo Guelhermino.

Nia hatutan katak misa ne'e hodi, "agradese ba bu'at di'ak ne'ebe hetan husi graca maromak ninian iha tinan 2012 no simu tinan foun 2013."

Antes remata padre parko ne'e hato'o ninia mesajen ba sarani iha parokia Bekora no husu atu sarani sira respeita sira nia moris no labele estraga moris ne'e ho bu'at la'ek sira.

Misa ne'ebe tuir lolo'os atu hola fatin iha gruta besik igreija ninia sorin obrigatoriamente muda fali ba Igreija laran tan ba udan bo'ot ne'ebe fase kapital Dili mais ou menus liu oras hat nia laran.

Tuir observasaun misa iha igreija sira seluk iha kapital nasaun ninian hala'o tarde no daudaun ne'e sei kontinua hela. Daudaun ne'e paixon tarutu lemo iha bairo sira iha cidade kapital Timor Leste, nune'e hamriik iha fatu ahi fihir hikas bele nota Dili laran kuaze atu nakonu ho ahi lakan piska-piska, antes oras troka tinan ninian to'o.  ninian tuir irama muzika disku iha prezeviu sira. Iha Palacio Governu nia oin ema lubun maka halibur malu hela hamutuk ho kantores balun atu anima populasaun sira.


No comments: