Sunday 23 December 2012

Quo Vadis Timor-Leste? – Rumu Ba Ukun-Rasik An ka Kolu-Molik An?


Ho: Frederico Jerónimo Boavida
Ex- Jornalista Repoter Rádio Fini Dioseze Baucau 2007-2008

Ita lee, rona no asiste ema barak husu liu husi TV, Jornál, Revista no Diskursu sira: pergunta mak sempre hanesan – Quo Vadis (iha Lian Latin); Dove Va? (iha Lian Italiano); donde vás? (iha Lian Espanyol); Para Onde é que vai? Where Are you going? ka (ou) ba nebé TL? Ita; tanba dit la hatene futuru Timor-Leste nian atu sai oinsa loos; tan ne’e mak ita husu Timor-Leste atu ba nebé loos! Timor-Leste Rumu Ba Sai Siganu Eh ( = entah) Sai Malae-iha-rain-rasik, karik; se mak hatene? Oinsá ho ukun-an? Ka atu ba Kolu-Molik-an no sai Laek buat hotu: Laek rain, Laek Kultura, Laek Lian, Laek Rasa, Laek Relijiaun, Laek Nasionalizmu no Patriotizmu no karik hakarak mak sai fali malae iha Rain rasik; hodi nune’e lakon buat hotu hanesan Siganu ida mak bele la’o lemo-lemo no moris husi mundu nakukun tanba kondisaun no sirkunstánsia sosiál no la’os Siganu Orijináriu sira nebé mak pur natureza lori karákter nómaden.

Á’at  liu tan mak ita Timor-Leste hahú goja ita nia Ukun-Rasik-An iha enkuadramentu Iróniku: katak, de tal maneira inventa no hatuur forma sosiál iha agrumentu no aglomerasaun sosiál husi individu ida-idak ho karákteristika privadu ida-idak nian no ho neneik reveste fila fali tipu no espésie foun karakterístika sosiál kolektiva nian mak bazeia ba estatutu grupu no konvensaun naun-eskrita husi nebé mak haburas hamutuk no ho dezenvolvimentu de tempu individu ida-idak lakon hikas ninia auto-konfiansa, auto-domíniu no auto-determinasaun hodi hamriik fortifeiu ba grupu mak reveste-an totál ho personajem mítika no místika ida ninia karaterístika individuál no ikus mai ita hetan ema ida loos dit mak domina tomak ema hotu (individu ida-idak iha grupu ida ne’e nia laran): no hakarak ka lae; saida mak personajem ne’e hakarak ka la hakarak, hanoin ka la hanoin no mehi ka la mehi; mak membru sira sujeitu no subjugadu segamente (ho delek totál) sempre  halo tuir no ikus mai individu ida-idak lakon ninia Ukun-Rasik-An no grupu kolu molik nia no individu ida-idak sai meramente objektu no instrumentu hanesan besi a’at, hena a’at no estatua ka boneka ida mak grupu ne’e hakarak utiliza no uzufruir ba sira nia meta no objetivu kamufladu/hafalun-an ba hanesan fantose ka fantazma ida. Konsekuénsia mak personajem rasik inkonsiente ho grupu transforma no inkorpora tiha iha ninia personalidade individual pernosajem ne’e ninia-an rasik karakter ida hanaran Absolutizmu ka Ditador no grupu hahú haburas réjime ditadura no iha ida réjime ditadura ne’e mak manan terenu no kampu de atuasaun mak hahú haliis ba pontu estremidade ida mak hanaran: radikalizmu, fanatizmu, fundamentalista no estremista.

Estremista, Fundamentalista, Fanatizmu no Radikalizmu nebé mak ita akompanya universalmente iha mundu no sempre rona; ida ne’e iha ezizénsia polítika ida husi jogu polítiku Dezenvolvimentu Umanidade Globál nian hodi utiliza elimina tabuu, Racizmu, Elimina Nasionalista no Patriotista Negativa (katak Patriotizmu no Nasionalizmu mak taka-an ba mundu nia dezenvolvimentu globál no proibe ka bandu ninia povu atu uzufruir meius elektróniku: Rádiu, Telivizaun, Rakal, HT, Hand Phone, Telefone fixu, internet, I-Pad no selu-seluk tan) no ita sempre haree Figura Konyesida Mundiál sira sempre negosia de tal maneira atu transforma sosiedade iha paíz ida nebé haterus ninia povu atu povu sira hetan hikas Liberdade no sente hetan hikas aar entuziazmu nudar influénsia husi “The Wind of Change” no “Moru/Tembok Berlin” nebé mak durante ne’e sulan sira iha vida primitividade/Kolot nia laran sai nakrahun no bele haree naroman.

Akontese iha Timor-Leste Poítika utiliza Estremista, Fundamentalista, Fanatizmu no Radikalizmu em vez halakon primordiál negativu no Primitividade Klásiku negativu mak halo nakukun no sulan povu ne’e atu nakarahun; ita iha Timor-Leste utiliza hodi tolan hikas ita  nia oan sira mak hakat to’o tiha no hetan ona naroman monu hikas ba infernu kidun molok beiala sira nia tempu; ita kolu ita nia oan sira halo laek buat hotu ho razaun katak sira Riku, Moos, Matenek, Santu mak hatene hotu no diak liu buat hotu no ho ida ne’e ita sai anti dezenvolvimentu no monu ba krize identidade no tama iha faze kompleksidade Psiko-Sosiál Patólojiku mak Emveija katak nusa sira bele no hau la bele; tansa sira riku iha materiál no hau la’e; tansa sira goja hanesan dit ho malae no hau lae mak halo ita sente inferioridade no ita haburas mak karakter barbariedade feroza no kruel iha ita nia-an no hakarak haan-raan dùké sai envezozu pozitivu katak hau enveija atu hau mós bele buka dalan hodi hakat neneik ba oin hodi to’o mós hanesan sira no la’os atu buka dalan oho-an (bom bunu diri tanba hau nia enveija megalómaniaka katak bulak teb-tebes hakarak sai riku no ema boot derepente!).

Kuidadu ho konsepsaun, kompriensaun no disernimentu ba informasaun insufisiente katak kuidadu interpreta informasaun la adekuada no proporsionál mak foti kedas nudar sínteze ka substánsia no esensia ba algu ida; wainhira iha falta de komunikasaun ka “miss-Communication”; basá bele rohan ba halo a’at an-rasik. Ita la bele uza tilun dit hodi justifika buat hotu mak agora iha era modernizmu globál ida ne’e sensuradu; katak ita tuur iha fatin no ema seluk huu mai ita lia-anin ka elektrónika dezvia vóz de fundu no kria senáriu ida hodi lasu ita tama armadilya artifisiál no ita rona dit ita tolan kedas! Ita la bele halo Tilun mak sai Fali Ita nia matan! Se ita komete karik aktus kriminais ida iha fatin públiku ka ita tortura no prátika asasinatu/homesídiu ida mak ikus mai rasta ita ba tribunál atu ba hatan mak Juizes sira husu: - “Ó haree duni ho matan no Kaer ho  liman rasik?” mak ita hatan fali – “Lae! Hau Rona dit!” – “Ó rona husi se!” – “Hau rona ninia lian!” – “Nia se?” mak nia ida hau rona ninia lian ne’e nega, dezmente ka reforsa mós hodi hatan hikas – “Hau mós rona hanesan husi nia ida seluk tan!” no rohan ba Kuda-Tali-Rebo-Rebo hodi sai Laho Tilun no monu ba grupu “Laho-Tilun” anónimu mak kompostu husi ema deskonyesidu mak haforma-an “Terrorista” seim organizasaun ka Grupu ida mundu tomak tauk mak bolu Terrorizmu no mundu konyesedor no polítiku pro-dezenvolvimentu umanidade inventa hikas “personajem iska” (sai nudar figura terorista) politizada ho fama mundiál hodi bele elimina Laho-Tilun; tan ne’e mundu dezenvolvidu tais/filtra  informasaun, mensajem no aktus hotu nebé mak tenke pasa liu husi sistema telefónika atu bele reforsa ita ida-idak wainhira hetan akuzasaun no sai suspeitu ba aktus kriminál; ita inosente ka sala la’ek karik ita iha evidénsia no prova atu bele aprezenta-an hodi defende katak hau rona, kaer ho liman no iha prova arkivadu tiha ona iha portál elektrónika no ita nia Estadu bele interven hodi buka iha Sentru Investigativu ka Sentru ba Telkomunikasaun atu media ka halo mediasaun ba ita nia kazu no bele buka solusaun adekuada no pasífika! 

Aktualmente ita bele artifisialmente manan Kazu mak ita komete lisuk krime liuhusi jogus grupu nian: mak hanesan ita sulan hamutuk kbiit-laek no sala-laek eh inosente, hafoin ita hafahe malu ba parte rua Pro-no-Kontra; ita buka sulan públiku no hadiuk no halo bilaan públiku, ikus mai wainhira públiku toman no baibain katak – “Eh, diak hela sa! Sira sempre hanesa ne’e!” no ita inventa senáriu katak dezastre, atake kárdiaku eh hetan bolsa estudus no ba tiha ona eskola; ita esplora fasilidade Elektrónika – Liu husi boikota telephone (hamosu ‘roming’ distorsaun mak ko-insidénsia entre vozes – lian ida mak individu loos nian no lian seluk mak ida boikota; ita uza nafatin sistema hafalun ho I-pad – hau hatetek ba I-pad animal hateke mai hau no hau nia lian sai eh hau hateke ema ida seluk no ninia lian ho nia oin mak sai maibé hau duni mak hasai lian hodi uza I-pad); hau transforma Baucau mak Dili, Ermera, Ainaro, Lospalos no Likisá eh Suasi, Bobonaru, Manatutu, Atauru, Same, Oekusi, Viqueque no Aileu – Vice-Versa hodi dehan ema la’os iha Dili maibé iha Distritu rasik no mate iha nebá lori fali mai iha ne’e no mate iha ne’e lori fali ba nebá; konsekuentemente ita tama iha “Hasulan Forsadu, Halakon Forsadu no tráfiku ba ema mak fraku no mesak, kiak no inosente!” Ita tuir meti-metin hodi skak ema ida hodi kria senáriu mak tátika dama eha sadrez: regular ka guerilya eh random hodi manan buat laek ida mak hakotu inosente ida nia moris no haburas ita nia mentalidade mak anti Lei no Ordem eh tauk moris iha realidade; maibé la tauk atu kontra lei no ordem no la tauk atu moris iha nakukun no kotu-kotu eh helik. Hau louva Mundu modernu; mak la konsege kontrola ninia ema hodi husik hala’o baibain entau utiliza sistema Kamera Detektiva hodi sensura movimentu ninia povu no Estadu iha ninia interasaun sosiál, assim ke mosu faktus krime ruma; dehan iha área nebé sira lokaliza kedas no identifika kedas. Nune’e mak ita buka atu bosok manan loos ho modus operandi hotu….

Ita liu tiha ona esperiénsia pasada mak ita rona Liafuan ka Termus: “Mauhuu no Bihuu!” sira nebé huu door tilun no inosenteoan sira rona dit hodi halai tuir ba no monu ba “Koak-Ibun”; hafoin ikus mai mate mesak no mate-faak! Mauhuu no Bihuu mak huu karik Kreatividade no Inspirsaun Konstrutiva hodi buka lisuk solusaun ba Problema no halo mediasaun; ida ne’e sei haburas Dezenvolvimentu. Mak ita sai Mauhuu no Bihuu hodi sulan lisuk ema mesak loos ida dit, laek buat hotu, laek maluk, kiik, kiak no ho konyesimentu la sufisiente; ita inderetamente hanesan neo-kolonialista no neo-invazor mak impede ukun-an no sai anti dezenvolmentu; inkonsientemente haburas lisuk Sidade ka Palásiu da Sinzas katak Sidade no Palásiu ka Paíz ida nebé ikus mai sai rai-rahun.

Ita mós rona no haree senáriu mak kria kondisaun haliis ba pontu estremidade rua atu haketak malu para sempre: Boot hakribit kiik, Riku hakribit kiak, matenek hakribit matenek-uiton, Forte hakribit fraku; hanesan karik nain rua nunka presiza malu;  afinál: kiak, matenek uitoan, fraku harii ka sai “mão das obras” ka Kuli Bangunan no kastigu-an iha loron manas laran hodi hari edifísiu nobre iha fulan barak ka tinan tomak to’o Edifísiu sai Palásiu Nobre no Ministériu; ikus mai matenek no moos oan sira tuur iha AC okos haluha no inkonsiente katak sira nebé ita hakribit ninia liman-rohan mak ita goja dadaun; liu tan ida ne’e estrada, ponte, hospital, restaurante, hotel, Igreja no natar, toos, fahi-luhan, bibi, karau no kuda luhan mak ema kiik, foer, kiak, no fraku sira hodi fera-ruin no kastigu-an atu transforma hodi sai produtu Feitu  ka husi materiál em Kru hodi transforma ba Produtu “Siap Pake”; no inkonsiente mós ita interdependénsia. Wainhira ita sulan ona ema ida folin-laek tuir ita nia konseitu barbariedade ne’e mak la seluk la leet ita kria kondisaun ida hanaran Solidaun no Melankolia mak sei halo ema saudade ba “EUTANAZIA”aktus voluntáriu ba oho-an ho razaun tanba la auguenta tan ninia moras mak tortura no fó naha todan ba ida seluk ka sir seluk!” – ita  grupu hamutuk hakarak hamosu Estimulus-Respons atu individu ida frustradu, dezperadu, traumatizadu ne’e tenke prátika Eutanzia ka “BOM BUNUH DIRI!” no ita hakarak hatudu ba mundu dehan ema ne’e terorista duni to’o oho-an rasik; más afinál ita ho grupu Siganu ka Malae-iha-Rain-rasik mak kria hela kondisaun Mentalidade Sublime ka Sizofréniku ida atu sulan ema!

Keta haluha mós parte ne’ebé ita kiik, kiak, matenek uitoan no fraku hanaran, ema-boot, riku, matenek no forte (nebé sira la sente-an maibé inderetamente ema mak hanaran hanesan ne’e ba sira tanba kondisaun no estruta sosiál mak hanesan ne’e duni nudar konsekuénsia husi Dezenvolvimentu Sosiál); katak sira diak ona ne’e iha mós no kontribui parte boot no hala’o kargu dezigual no kmanek iha Vida sosiál: Bispu (ema-boot, moos no matenek) nune’e mós ho padre no madre sira; Ministru, Deputadus, Prezidente da Repúblika, Distintu Prezidente Partidu Polítiku sira nian no Kuadru sira Estrutura partidu nian, Forsas, Polísia no Seguransa sira; Reprezentante Naun-Governamentál no Sosiedade Sívil sira mak nudar ema ho estatus sosiál tantu husi kareira intelektuál, Polítika no profesionál mak dudu sira hodi reprezenta povu; sira sai duni ema nebé mós kontribui ba Dinamizmu no Mekanizmu Mákina Produtividade iha Dezenolvimentu Estadu. Tan ne’e sosiologu no kunyesedor siensia teórika sosiál nian hanaran Estadu hanesan Mákina ida ka espésie ka prafuzu kiikoan no folin laek no mós pesa prinsipál ka Mákina Prinsipál  mak avaria ka a’at halo mákina hotu paradu no la funsiona; tan ne’e parte ka partikula ka espésie ida-idak útil no funsiona tuir ninia funsaun rasik. Ne’e duni ema ida-idak iha nasaun ida, paíz ida no Estadu ida sempre útil ka iha valor no folin iha Rai ida – no ema boot, moos, riku, matenek, forte sempre presiza ema kiik, kiak, matenek-uitoan, no fraku vise-versa ho kondisaun ba sira mak hatene duni ukun-rasik-an mak sei ukun hamutuk no fahe ukun-an ka hala’o inter-dependénsia nian!

Tan ne’e hau Reklama ka ´Hau Mengugat!’ Hau ukun-rasik-an mak diak ka tabele-an mak diak? Hau fiar-an mak diak ka fiar ema seluk mak diak? Hau haburas-an no hariku-an mak diak ka Hau kolu molik-an mak diak? Eh ema seluk kolu molik hau nia-an mak diak? Hatene ukun-rasik-an; sei hatene ukun hamutuk; hatene fiar-an sei hatene mós fiar ema seluk; hatene solta-an no la tebele-an mak sei hatene atu la esplora no la pratika korupsaun hasoru ema seluk; hatene la tabele-an mak sei hatene mós katak interdependénsia la’os tabele malu maibé kompleta malu ho ida-idak ninia dependénsia  ka ninia ukun-rasik-an!

Timor-Leste dolar neneik; hahú la’o – :”Ete o Tai” ka hamriik hodi la’o koko no/ka monu hikas; fila ba fila mai; no to’o agora hahú la’o sidi-sidi ba ninia futuru! Ita asiste transformasaun Timor-Leste nian mesak liu husi Drama Umanidade Trázika tantu mundiál, rejionál, nasionál no lokál mak hanesan: Kazu primordiál beiala nian; Krize mosu husi Mudansa Polítika Nasionál; Guerra Sívil (konsekuénsi Dekolonizasaun Portugeza no Kontra-Atake no Auto-Defeza hasoru Invazaun RI); Konflitu entre Paizes iha Rejiaun Ázia (Tantu Sudeste Aziátiku to’o Ázia Menor) sempre husik hela impaktu no sikatrizes (fitar) mak afeta duni Timor-Leste.

Konsekuénsia Drama Umanidade Trázika mak hanesan Sidade no Vila ala Arkitektura Barroko no Gótika Timor-Leste nian nebé uluk sai karaktérisktika Kolializmu Portugés iha Timor-Leste sai nakrahun (Sidade Munisipál: Kámra Munisipál sira; Merkadu Munisipál, Ospitál Munisipál; Kámra Ekleziastika; Katedrál Nobre iha Dili; trasu Sidade Barroko no Gótika hirak ne’e nakrahun); Balada (animál no variedade espésie plantasaun barak mak sai ekstintu); ema Timor-Leste ho númeru populasaun husi 1935-1975 aproxíma tiha ona 700.000 nebé rejistradu iha Dadus de Baze Estatístiku Demografia nian mak reduzidu tiha ba 400.000 no agora hahú fali sa’e to’o 1.900.000 e tal ho taxa relatividade iha mortaidade ho natalidade; maski relatóriu rejista katak Taxa Mortalidade Natural tanba idade idoza; maibé sempre iha Taxa Mortalidade Imprevista mak hanesan mate tanba krize: hamlaha (famintu) mak provoka má-nutrisaun infantil; mate tanba Krize no Konflitu sangrentu mak hamosu mate no dezaparesimentu forsadu. Konsekuénsia seluk mak hanesan: Krize no konflitu husik leet “Danos Causados” (Estragus Provokadus) afeta ba materiál fízika: infraestrutra no meius komunikasoens sira. Konsekuénsia mós afekta Rekursus Umanus, Intelektuál, legál, polítika no Esperituál ka Morál, eh Kapasitasaun Produtividade.

Drama Umanidade Tázika hirak ho konsekuénsia inevitável mak afeta Timor-Leste ne’e husik leet hela situasaun no kondisaun fakuldade psikolojia sosiál ba Timor-Lesteoan sira mak hanesan Idozu no Idoza sira Dezesperadu; juventude kresidu no adultu Frustradu; no labarik sira traumatizadu. Katak Dezesperu, frustrasaun no trauma fó forma Psikolojika Sosiál iha interasaun no konvivénsia ho personalidade kompleksa ba Timor-Lesteoan sira no sai Estadu Fakuldade Psíkika Umana prometedora ba Ezizénsia Resposta Pertinente mak hanesan “Counselling” ka Akonsllamentu! Karik tan ne’e mak ita presiza agora rona dit populasaun nia halerik no keixa ho histeria dùké ita mak koalia barak! “Counselling” ka Akonsellamentu dalan diak liu tanba husu ita atu nonok no rona saida mak cliente  ka “Vítima” atu espresa, keixa no halo konfisoens nudar  katalizador ho dalan katarze miotika katak (Nain-rasik kura-an husi saida mak nia hakarak hasai tiha husi ninia fuan laran nudar trauma no todan boot ka naha ba nia).

Rona la’os atu hala’o ba-an katak la tenke fahe todan mak halo mihis mós ita-an rasik nia psikolojia no emosaun no afekta fila fali mai ita maibé rona hodi buka solusaun no kaer nudar lisaun! Rona nia halerik karik tan nia trauma, desperadu no frustradu ho ninia moris! Reparasaun mentál ida diak liu mak Ó halerik no Hau rona! Hau halerik no Ó rona! Hau hamansa no Ó rona! Ó hamnasa no hau rona! Hau haklalak, hamnasa sarkástika (katak hamnasa no kontente haree ema seluk terus) falun ho ódiu no vingansa atu Ó rona no vise-versa! Halo ita kunyese malu se mak laran mós no se mak laran a’at! Selu-seluk mós rona no hatene! Ikus mai se Hau laran foer ba Ó no Ó laran foer ba hau halo hau kunyese Ó no Ó  kunyese hau mak halo ita kunyese malu! Tan ne’e ita ba an husu: hau lori hau nia ukun-an ba nebé? No Ita rua lori ita nia-an ba nebé? Twin-Tower lori Timor-Leste ba nebé no ita hotu mak harii “Pro” no “Kontra” Timor-Leste ne’e hakarak lori Timor-Leste ba nebé? Hahú husi ema ida-idak, Hau ho Ó no ikus mai ita hotu ninia konsekuénsia ba vida sosiedade Timor-Leste nian oinsa! Tansa hau gosta sikat leet iha ema nia problema no la hakarak involve iha mediasaun? Tansa mak hau hakarak liu harahun dezevenvolvimentu dùké haburas? Tansa mak hau sei iha ódiu no rankoor pasadu? Ida ne’e mak ita nia indikasaun ba ita ida-idak nia-an atu sukat oinsa ita ida-idak nia ukun-rasik-an afekta no fó impaktu no haburas ukun-rasik-an Timor-Leste nian ka lae?

Nafatin sei iha mentalidade Invazaun no okupasaun ilegál mak hakarak joga foer hela ba Rai Timor-Leste nia ukun-an ho fila-an-tuun sa’e! Diak ami nian; aat Ó mesak nian! Diak mai ami; ami hamnasa! Aat ba Ó ami hamnasa no aat fali mai ami ami la simu, ami revolta! Ida ne’e mak ita fó forma no hahú haburas karakteristika Timor-Leste nian mak hakarak sai duni oportunista dit iha Timor-Leste mak la seluk la leet sai Siganu no sai Malae-iha-rain-rasik? Ida ne’e la’os ita kolu molik ita nia-an! Ita nia ema haleu ita nia susar ita la sente empatia no hatudu solidariedade maibé sei dehan tan – “Merese ka Fase-Matan!”; hahú ho ema ida, hafoin nain ida seluk tan no ho neneik hau lakon maluk hotu; halo hau sai kiak no sai fahi (sulan iha luhan laran)! Ida ne’e mak futuru Timor-Leste nian? Quo vadis Timor-Leste? –  Rumu ba ukun-rasik-an ka kolu-molik-an? Timor-Leste Rumu Ba Sai Siganu Eh ( = entah) Sai Malae-iha-Rain-Rasik, karik; se mak hatene? Oinsá ho ukun-an?

Baze nasaun ka Fondasi Bangsa nudar konsiensia kolektiva ka Kesadaran Berbangsa mak sai forma no nasaun ninia oin: wajah Bangsa! Oinsa atu fó karakter ba ita nia nasaun? Oin hafuhu malu? Oin tauk malu? Hatene dit mak sulan-malu? Oinsá ho Unidade? Se karik hakat sai ba Eventu nasionál sei hatene hala’o hamutuk ba interese nasaun nian? Ka iha kampu internasionál; hau hala’o mesak hau nian no Ó hala’o mesak Ó nian ba! Quo vadis Timor-Leste? –  Rumu ba ukun-rasik-an ka kolu-molik-an? Timor-Leste Rumu Ba Sai Siganu Eh ( = entah) Sai Malae-iha-Rain-Rasik, karik; se mak hatene? Oinsá ho ukun-an? Até lá! [Ex- Jornalista Rádio Fini Dioseze Baucau 2007-2008 ho naran Frederico Jerónimo] - Frenujebov -No. ID Kartaun Eleitorál: 00624197 – HP: 7285694

No comments: