Monday 24 December 2012

Timor Leste Prepara Aan Ba Natal 2012 Ho Kalmu

Tempo Semanal-Dili,24/12/2012

Iha liuron ninin kolomera ho eis merkadu lama ninia oin nakonu ho vendedores no mos sosa nain sira. Trotoar leten la'os de'it ona fatin ba ema atu la'o ain ninian maibe mos fa'an roupa no sasan sira seluk.

"Ami fa'an iha ne'e tan ba fatin mak ne'e no ema sosa duni," dehan Angelina Marcal.

Angelina Marcal ho idade 35 fa'an hela roupa ne'ebe habai iha trotoar kolomera ninian ne'e hateten katak ninia rendimentu aumenta duni tan ba loron ida nia bele halo to'o dollar atus rua ba leten.

Nia hatutan katak durante ne'e sira la hasoru problemas hanesan jovens sira baku malu iha parte refere nune'e la interompe sira nia atividades iha fatin ne'eba.

"Ami fa'an iha ne'e la hetan ameasas ka ema mai halo kompranca iha ne'e. Ami kontente tan ba situasaun seguranca iha ne'e di'ak hotu maske PNTL la halo patroliamentu iha ne'e," Angelina dehan.

Husi Parte seluk sosa nain Maria Asuncao ne'ebe fihir hela hela iha parte Kolomera dehan nia gosta sosa roupa sira iha fatin ne'eba atu lori fai ba distritu nu'udar presente natal ba ninia maluk sira.

"Sasan iha ne'e ninia folin di'ak no kualidade roupa ba labarik sira iha ne'e mos di'ak," Maria Asuncao dehan.

Nivel kompriensaun husi komunidade hahu di'ak nune'e sira rasik maka mantein seguranca di'ak ba sira nia bairo inklui mos kolomera hodi garantia situasaun ne'ebe konduxivu atu ida-idak hala'o ninia kna'ar.

Iha parte seluk tuir observasaun iha jovens sira ladun halo problemas hanesan tinan-tinan liu ona. Jovens sira preokupa aan ho halo prezepio no ladun hatudu sinais hemu iha besik fatin prezepio ninian maske iha fatin sira ne'e sei iha muzika disko, rege no pop maka akompania ho lampu disku hamaluk prespio mininu Jesus ninian.

Tuir mos observasaun Governu hola iniciativa halo presepio iha fatin publiku balun inklui tau lampu ho pohon natal iha palacio do governu, iha jardin Lecidere, jardin rotunda Merkadu lama no fatin publiku seluk hodi harame kapital nasaun ninian.

Iha Palacio do Governu ninia oin Governu iha palku muzikal ida hodi anima komunidade sira. Iha kalan tuku hitu liu loeon 23/12/2012 banda muzika balun toka no kanta hodi dada komunidade sira ba iha fatin refere.

No comments: