Komunidade Zulo Ejize Bee moos

Tempo Semanal - Dili, 06/12/2012

Problema bee moos la’os de’it  akontese iha Suku Zulo, maibe kuaze akontese iha teritoriu Timor-Leste oin sa maka seidauk hetan resposta ba problema ne'ebe maka dala barak ona ema halerik. Ita hein de'it........

BEE nu’udar nesesidade baziku ba ema moris. Hanesan iha lian Indonesia hateten, “air adalah sumber ke hidupan manusia”. Maibe, oinsa ita bele apar liafuan hirak ne’eho situasaun real ne’ebe akontese ba komunidade Suku Zulo infrenta. Tanba, tinan barak ona komunidade refere halerik bee moos.

“Klaru katak, bee importate ba ita ema moris. Maibe, tansa to’o agora ami seidauk hetan bee moos?” komunidade Suku Zulo kestiona.

Situasaun ne’e, obriga komunidade Suku Zulo ejize ba Governu, liu-liu Dirasaun Nasional Serbisu Agua Saneamentu (SAS) atu responde lalais kestaun ida ne’e. tanba, daudaun ne’e, komunidade Suku Zulo, la’o to’o km 1 ou 2 hafoin kuru bee moos.

 Xefe Suku Zulo, Afanso Talo Mau ba Tempo Semanal hateten, ho defikuldade ne’ebe komunidade Suku Zulo hasoru, nia (Xefe Suku-red) hato’o ona proposta ba Governu, liu husi Dirasaun SAS Distrital no Nasional, no propesta refere hetan aprovasaun iha tinan 2010, maibe ninia implementasaun seidauk realiza.

Hafoin proposta ne’e hetan aprovasaun, Xefe Suku Zulo sempre halo kontaktu ba SAS Distrital, hodi buka hatene, bainhira loos mak projetu ne’e atu implementa. Maibe, liafuan “hein de’it” mak durante ne’e komuniade Zulo simu husi parte SAS Distritu Kovalima.

“tuir loloos, iha fulan Outobru 2010 komunidade Suku Zulo bele asesu ona ba bee moos, maibe realidade hatudu to’o ohin loron seidauk realize. Komunidade sira mos sempre ejize ba ha’u, maibe ha’u fi hatene ba sira katak, ita hotu tenke pasensia hodi hein desizaun Governu.” Afonso konta tuir.

Maski nune’e, maibe ulun boot Suku Zulo ne’e, nunka tuur hakmatek. Nia esforsu nafatin oinsa komunidade ida ne’e bele hetan lalais bee moos.(*)