Foer: se mak sala.............?

BY FJF

Bainhira ema hussi taci balu tun no tau ain iha ita nia rain, ita bele hare iha sira nia oin katak sira fihir no hare ba ita nia rain nia foho no kles neebe furak tebes. Dala barak ita hussu ba ita nia a’an rasik; saida lo’os mak sira hanoin no hatete kona ba ita.

Ita fihir sira no hanoin karik sira hanoin hela kona ba ita nia rain neebe kapas, hakmatek ona. Rain ida neebe sei iha fatin barak mak sei mamuk hela, rain ida neebe ho nia istoria neebe barak, ricu ho laran luak.

Maibe bainhira ema taci balun sira ne’e sai hakat sai hussi aeroporto no ba cidade, sira hare katak rai ne’e kapas maibe foer ne’e bohu iha fatin hotu tun sahe hela deit. Fahi mak hadaau malu ho motor no kareta, assu no dala barak bibi mak halai tun sahe hela iha luron cidade nian. Ita bele hanoin kata ita nia cidade ne’e luhan bo’ot ida neebe sena fahi, assu, bibi ho ema hamutuk hotu.

Tan sa mak ita sai nune! Nain sira la hatene sulan sira nia fahi no bibi. Ema be lao tun sae luron emu be copo soe tun ba rai. Foer nia fatin ne’e la hatene tia deit iha neebe. Valeta kuak nakonun ho be botir mamuk no copu ki’ik be nian. Udan tau tun hotu ba taci no dala barak la tun ida tamba halo valeta kuak metin hotu be sahe.

Iha ne’e mak hau hussu; sala se nian? Ita nia uma laran ita soe foer ba rai! Karik iha ita nia uma laran ita soe  foer ba rai hanessan ita halo iha cidade laran! Ita hatais patrata rtun luron lalar mo’os tauk atu tur iha ita nia faro. Maibe ho patrata ne’e la hare katak la’o hela iha foer nia laran. Patrata ba halo tan foer tamba hamrok emu hotu soe ba rai.....

Tur hamutuk emu tua mutin ida ka cerveja hahu koalia hassoru Governu tamba la hamos cidade laran foer mak barak!!!! Lo’os duni ita bele dehan cidade foer. Maibe foer ne’e mai hussi nebe no se mak halo???? Governu ka ita rasik?  Se ita iha luron soe foer la hanoin, tan sa mak mak ita koalia hassoru Governu. Karik Governu haruk ita ka selu ita ba halo cidade laran bohu ho foer? La’os Governu nia knar atu hamos tutir ita sira neebe halo foer ka soe foer ba rai.

Hanessan oan rai murak Timor nian ita hotu tenki hahu hanoin halo nusa mak ita bele hamenus foer iha cidade nia laran. Hamenus fahi, bibi mo’os la’o tun sahe luron. Acidente hirak mak hetan tamba fai bibi ka fahi bainhira sahe motor? Hirak mak kelen ka liman tohar tamba animal deit? Ita ruma hanoin ona kona ba ida ne’e.

Kona ba foer; se ita halo foer ita hamos, se ita soe ba rai ita hili. Hau hanoin katak dala barak ita moe hili, maibe ita la moe soe tun ba rai. Dala hira mak be sahe iha Dili laran bainhira udan riba makas? Ita bele hare beibeik kona ba be sahe tama uma laran besik sahe to kakulun. Ne’e tan sa. Tamba ita nia hahalok soe foer halo valeta kuak sira nakonun ho foer hodi halo be la halai. Tan sa no tan se!

Ita ida ida hanessan Timor oan tenki hahu hanorin ita nia oan sira iha ita nia uma soe foer ba foer nia fatin. Escola mo’os iha dever ida ba hanorin hamenus foer, no soe foer iha nia fatin.

Ne’e tan sa! Hodi ita nia rai bele mos, no hamenus sussuk. Malaria, dengue no moras seluk neebe labarik nurak no foin sa’e hetan beibeik tamba foer nia i’is iha cidade laran.

Kona ba i’is neebe dois to terus labele neebe mai hussi fahi nia sintina. Udan tau, fahi nia dois moris halai namkare tuir uma le’et tama vizinhu sira nia uma laran. Hahan nia morin lakon tia deit tamba fahi nia i’is foer mak maks liu fali morin hahan nian.

I’is dois ne’e mak halo ema moras, no foer hakiak sussuk no halo bokur be bokur hodi susu ita nia ra’an.

Balu bele hanoin katak hau hakerek ba defende Governu! Hau bele dehan ba imi hotu katak lae. Hau la servisu ba Governu ka hau hakerek ba halo propaganda ba governu. Hanesan Timor Oan hau nia dever foti buat hirak ne’e tamba hare katak la lo’os no sala bainhira ita rasik halo foer cidade. Ne’e ho ne’e deit mak hau hakerek kona ba ida ne’e. Tamba se ita hotu hakarak ita nia rain mos, foer la iha, ita hotu hamutuk tenki hanoin katak ita labele soe foer ba rai ka iha luron arbiru deit tun sahe cidade laran.

Se dala ruma ona ita ida ida hanoin kona ba ne’e! Saida mak ema neebe mai hussi taci balu bainhira tau ain iha ita nia rai hare hahalok ita nian soe foer saida mak sira koalia no dehan kona ba ita Timor oan. Sira bele la dehan buat ida iha ita nia oin, maibe iha ita nia kotuk bele tetak ita rahun didiak no bolu ita Timor oan foer ten. Hanoin didiak ita la simu bainhira ema koalia hassoru ita. Se ita la simu, diak liu ita ida ida hahu halo buat neebe lo’os ba ita nia rai.

Hau hussu ba leitores Timor Post nian kona ba lia ida ne’e hodi ita hotu hamutuk halo reflesaun ki’ik oan ida kona ba foer iha cidade laran. Hau hanoin la sussar se ita hakarak duni ita nia rain mos. Ambiente, buat neebe halehu ita. Tan ne’e mak ita tenki tau matan hodi bele hadia buat hotu neebe ita halo sala no tulun ita nia ambiente.

Ita hanoin katak ita halo hela buat diak ida bainhira soe foer ba rai no hein Governu atu hamos.

Hanoin nune sala tamba ita nia hahalok la’os ba ema seluk mak tenki hamos. Dever ita nian iha neebe, hanesan uma nain ba rai doben ita nian? Se uma nain rasik mak halo uma foer lalika hein ema seluk atu mai hamos!

Se lai lalika tur no dun tun sahe. Tamba bainhira ita hatudu liman fuan ida, no dehan katak governu mak sala, keta haluha liman fuan tolo fila hela ba ita.

Ho ne’e hau fo hanoin dala ida tan kona ba ema neebe mai hussi taci balu saida mak sira bele hanoin kona ba ita. Sira bele koalia midar no la dehan buat ida iha ita nia oin, maibe, iha ita nia kotuk sira bele bolu hela ita foer ten.

Se ita hakarak hamenus moras, ita mak tenki hamenus soe foer iha cidade laran, ka iha foho no distritos hotu. Ita nia issin diak (saude) iha ita nia liman laran. Se ita lakoi hetan issin diak lalika dun ema seluk tamba sala nain mak ita hotu neebe moris iha rai neebe ita hotu bolu hau nia rain Timor Leste.  Se ita lakoi, lalika dun tun sae ema seluk tamba deit ita nia hahalok at ne’e............(FJF).