Wednesday 10 October 2012

20 Agosto loron Falintil


NOTTA: 
TEMPO SEMANAL SIMU PEDIDO KMANEK IDA HUSI SR. CAETANO ATU PUBLIKA NINIA ARTIGU NE'EBE SEI KOMPILA BA LIVRU IDA NE'EBE SEI FOO SAI BA PUBLIKU IHA TEMPO OPORTUNU MAI NE'E. NUNE'E DUNI LORLORON TS SEI PUBLIKA IHA EDISAUN TOO REMATA PAJINAS LIMA NOLU RESIN HAAT NE'E IHA NEE.

Se maka fundador Falintil?

Hosi Caetano Guterres Maulori

“Um dos Pioneiros das Falintil”, nebe halo plano kontra golpe nia hosi Companhia nebe halu konta material funu nia iha Timor, Destacamento do Serviço Material (DSM) Balide-Dili, hamutuk ho coordenadores Companhia seluk iha Dili laran, nebe sira nia naran sei lista ida, molok artigo ida ne’e remata, ami hotu iha Comando no orientasaun primeiro Comandante Geral das Forças Armadas da Defesa do Povo Maubere, Rogerio Tiago Lobato, naran ida ne’e maka ami fo dauluk, wainhira ex.tropas português prepara forsas armadas ida atu liberta Rai Timor Loro Sae, iha 11 de Agosto 1975, molok prepara atu halu kontra golpe, iha 20 Agosto 1975”.

Introdução
          Historia 20 Agosto 1975 oin sa FALINTIL moris, ne’e momento histórico nebe nia valor as teb tebes ba povo Rai Timor Loro Sae no ba história funu ba libertação Timor-Leste,  tamba FALINTIL maka liman kroat povo Maubere nia, ohin loron nakfilak sai liman kroak Povo Timor-Leste nia, FALINTIL maka hanesan fatuk inan “Pedra angular” ba alicerce RDTL, FALINTIL maka Salvador da Frente Revolucionario Timor Leste Independente FRETILIN, iha 20  Agosto 1975, ex.tropas Português lubun oan ida nebe ema kuase la fo valor to’o ohin loron, mesak divisa kiikoan deit, soldados, cabos, furrieis, sergentos, aspirante miliciano ida mesak oan deit, nebe la hanoin tan dala rua kona ba konsekensia saida deit maka sei mosu ba sira nia an rasik, maske ema português mos barak no forsas operasional UDT mos Barak, sira iha deit hanoin ida mate ga moris ukun rasik an, no atu salva nia povo rai Timor Loro Sae nebe moris terus no susar durante tinan 450!. Ex.tropas Português lubun ida nebe auto-organiza malu atu hari forsas armadas ida, se karik la halu  20 Agosto 1975, FALINTIL mos la existe, maka ohin loron kala ita labele ukun rasik an duni, Timor sai hanesan nasaun federado ba Portugal ou sai saida deit ita labele hatene só Nai Maromak maka kala hatene!.

Ba Nain ulun Timor Loro Sae nia sira, Maun alin inan feto Timor oan tomak nebe atan hakerek nain respeita no hadomi, historia 20 Agosto 1975, oin sa FALITIL moris nee, naruk teb tebes, maibe, atan hakerek nain sei halu resumo badak deit tuir versaun hosi Companhia ida nebe halu konta ba armazen material funu nia no kilat musan iha Timor paiol, nebe bolu naran Companhia do Destacamento Serviço Material (DSM), pontos balun deit odi loke dalam ba imi nia hanoin lesuk, odi imi bele halu konklusaun ida justo no equilibrado, se se deit maka bele soi, atu bolu naran ga fo naran ida FUNDADOR FALINTIL nia, ema ida deit ga, eh liu ema nain ida, hosi militar ga hosi ema civil, ou militar no civil hamutuk, tamba dala barak ema sempre koalia nia an deit wainhira ita hetan vitoria boot ruma, manan buat boot ruma, katak nia mesak maka halu buat ida nee ou buat ida neba, nee  mos ita labele fo salah, tamba koalia sira hanesan ne’e biasa hanoin ita ema nia, “ tendências da natureza humana, kodrat manusia ,  human nature tendency”!. Tamba ho razaun ida nee maka precisa ita ema barak no matenek barak nia hanoin lesuk, atu tau hamutuk ita nia hanoin lesuk sira ne’e maka ita bele halu konklusaun bele halu konklusaun ida ke los!. Deskulpa hatan hakerek nain koalia nune, tamba timor nee ita hotu ninia, barak ga uituan, ita ajuda malu, ita servisu hamutuk,  ita terus hamutuk, ita tau hamutuk maka bele kompleta malu, odi timor bele sai manan i ohin loron sai nasaun ohin ida, ema ida deit labele halu buat ida, ida ne’e experiencia nebe ita hetan iha funu naruk durante tinan 24 nia laran  “lado a lado, saida by side, hand in hand, mutuamente se completa e se determina uma vitória, salin mengisi dan melengkapi barulah menentukan sebuah kemenangan!”, maibe tenke iha comando central ida nia okos, i comandante ne’e tenke hanoin nain no hanoin boot “Pemikir besar”no estratega makas nebe bele hatene trasa estrategia oi oin iha kampu polika, militar no diplomatika.

Atu komesa ho historia ida nee, uluk nanai hatan hakerek nain ho respeito hakarak hatoo nia homenagem, honra louvor no Gloria ba saudosos herois FALINTIL sira tomak, nebe ho aten brani ho indomável espírito, halu funu i mate iha batalha, iha tiro malu nia oin, iha tiru malu nia okos, nebe barak molok atu is koto sira sei hakilar “A luta Continua! Pátria ou morte venceremos!”. Balun is lato’o, koalia labele ona, maibe sira sei kumu sira nia liman”!. Sira fakar sira nia ran tomak, sira barak nia ruin sei naklekar nafatin iha ailaran fuik, tamba sira nia rate to’o ohin loron ladauk hetan, no mos ba FALINTIL sira nebe mate tamba moras, mate tamba hamalaha no hamrok, sira nebe mate tamba ema kaer kastigo no latahan iha tortura, no ba sira nebe mate oin selu seluk, ba libertasaun ita nia rai doben Timor Loro Sae!. Ba sira tomak hau hakruk, ho neon nakraik, hamulak no ho respeito, hato’o honra louvor no gloria tinan ba tinan amem!.

Parabens no homenagem ba herois Falintil nebe sei moris-Tuir mai hau mos hakarak ho respeito hatoo iha biban ida nee, hau nia parabens ba Herois Falintil nebe sei moris, nebe resiste tinan 24 iha ailaran, iha Frente armada, hanesan General Taur Matan Ruak, General Lere Anan Timur, Coronel Sabika, Coronel Falur, Coronel Maunana, Coronel Koliati, Coronel Pedro Klamar Fuik, major Maukalo, Corneis hot hotu no Tenente Coroneis hot hotu F/FDTL nia, ou  halu badak liu Oficiais Superiores no  oficiais sub alternos no alternos, Segentos no praças, hosi asswain F/FDTL, no mos Sr. Brigen Filomeno Paixão no alin sira hosi Juventude nebe foin tama ba F/FDTL sira tomak  nebe hau la teme sira nia naran ida por ida, hatan hakerek nain nia parabens no homenagem ba imi hotu.

Parabens e homenagens ba Ex.Comandantes Geral FALINTIL sira-Tuir mai hakerek nain hakruk ho respeito wain, hato’o nia parabens especial, ba maun boot nain rua Comandante Geral das FALINTIL nia Sr. Rogerio Tiago Lobato, no Comandante Supremo da Luta e das Forças Armadas da Libertação Nacional, iha funu naruk e difícil, durante  iha tinan 24 nia laran atu liberta ita nia rai doben Timor Loro sae, Kay Rala Xanana Gusmão, atan hakerek nain, nia homenagem, honra no louvor ba maun  boot nain rua.

Parabens ba Koordenadores do kontra golpe no pioneiros das FALINTIL- Hakerek nain hakarak mos hatoo nia parabens no homenagens ba maluk asswain koordenadores do kontra golpe no membros hot hotu, nudar pioneiros das FALINTIL, nebe molok partido politico mosu iha Timor, ita koalia no halo plano ona kona ba exigencia urgente atu hamoris forças Armadas da Libertação Nacional ida, ba imi hotu hosi Comp. Quartel Geral ( QG), Policia Militar (PM), Comp. Intendência, Comp. Destacamento do Serviço Material (DSM), Comp. Destacamento de Sanitário Base (DSB), Comp. de Descamento da Ingenharia (DI) Companhia do Centro de Instrução (CI) i Manutênção Militar, nebe naran sei fo sai iha lista ida, molok artigo ida nee sei remata, no ba antigos combatentes no veteranos da libertação sira tomak,  nebe hau la teme sira nia naran ida por ida, hau ho haksolo ho respeito wain, hatoo  hau nia parabens no hakoak boot ba imi hotu.

Parabens no homenage ba Povo Asswian Timor Loro Sae- Hakerek nain mos labele haluha fo parabens ba povo asswain Timor Loro Sae nia tomak, nebe ho sentimentos patriotísmo nebe makas liu, la taok mate mas ke ema kesar kastigo, desterra ba rai do’ok no oho sira, maibe sira ho aten brani ajuda nafatin ba Falintil iha ailaran, ba ex.Falintil sira nebe servisu makas nafatin iha Frente klandestina durante tinan 24 nia laran, liu liu ba Juventude Lorico Asswain Sira, ho espírito patriotísmo nebe nakonu no nakale, avansa ho irus matan nakloke hasoru kilat, tankes no  Canhões iha Dili no iha Jakarta, nebe contribui makas liu ba mudansa iha Indonesia, nebe ikus mai bele contribui atu habadak funu resistensia nia iha Timor Loro Sae odi timor sae manan, hau nia parabens ba imi hotu.

Parabens no homenagen ba  frente externa- Ikus liu hakerek nain mos hakarak hato’o nia parabens no homenagem ba maluk Timor oan tomak nebe simu ho laran diak planu unidade nacional nia nebe Comandante supremo da luta fo sai no sira hotu simu ho laran haksolok odi servisu hamutuk ho representante especial hosi Comando da luta nia Dr. José Ramos Horta, nebe hanesan matan, tilun no ibun Kay Rala Xanana Comandante Supremo da luta nia iha rai Liur, nebe sira nia servisu hamutuk, maka bele atrai no dada simpatia komunidade internasional, ajuda halao no halu namkari plano mudansa Xadres politika nia, hosi Komandante Supremo da Luta ba fatin hot hotu, nebe ho sira nia servisu nebe makas tebes, odi ajuda Dr. Jose Ramos Horta, tau caso Timor makas liu tan iha visiblidade internacional, hanesan ahi nebe la mate, iha Organizaçoes das Nações Unidas ONU, Nee duni hakerek nain ho respeito wain hato’o parabens ho homenagem ba ita tomak.

Obrigado wain

Caetano de Sousa Guterres Maulori

No comments: