Tuesday 30 October 2012

Ataka Malu Jovens Iha Halilaran Sei Kontinua


Tempo Semanal - Dili, 29/10/2012

Ne'e mak estasaun mina
ETO iha hali laran (photo Tempo semanal)
Iha kalan mais ou menus besik tuku 11 mosu hikas fali konfrontasaun provoka no tuda malu entre jovens grupu rua iha besik merkadu halilaran.

Tempo Semanal to’o iha fatin akontesimentu policia duni lakon hotu ona grupu rua ne’e. Maibe jovens balun sei hafuhu husi portaun entrada ba merkadu Hali laran besik fatin bainbain fa’an naan ninian.

Kareta pajero mutin ida nakonu ho membru PNTL iha oin no kotuk ekipa ho sira nia ai tongat sa’e husi diresaun eis merkadu lama ninian halai neneik liu ponte hali laran no membru PNTL sira hakilar, “hoiiiiiii……buka problema hela ga?” Jovens lubun ne’ebe ulun de’it maka hafuhu sai mai liuron halai sa’e malu iha nakukun laran.

Tuir observasaun iha besik portaun entrada ba estasaun mina kompania ETO (Esperanca Timor Oan) kareta PNTL ninian hat maka para hela no membru PNTL balun besik hela ba baskolante koor azul ida ne’ebe para hela ba Estrada sorin.

“Kazu iha Hali Laran ne’e akontese kalan haat ona no ita sente katak bu’at ruma ladun loos ona,” dehan membru autoridade seguranca id aba jornal Tempo Semanal.

Autoridade ne’e husu atu tempo Semanal labele hatun ninia identidade ne’e hatutan, “ema balun kala hakarak halo problema ho estasaun mina irmaun Nilton ninian.”

Kompania ETO ninia nain maka Nilton dos santos Gusmao subrinu husi Primeiru Ministru Kay Rala Xanana Gusmao. Tuir Informasaun ne’ebe jornal ne’e hetan hateten katak tuir kriteria ne’ebe iha semana kotuk ETO manan hikas fila fali tender fornecimentu mina ba EDTL.

No comments: