PARTE II : Nepotizmu Iha Konstrusaun Jardín Lesidere Rui : “Projetu Barak La Transparénsia”

Tempo Semanal - Dili, 27/10/2012

Largo Lecidere (photo Tempo semanal)

TUIR Prosesu normál, bainhira kompañia ida atu hetan projetu tenke hatama uluk dokumentus ba iha Diresaun Aprovizionamentu hodi hala’o selesaun dokumentus. Kompañia ne’ebé liu husi selesaun dokumentus nia mak sei avansa ba konkursu tuir mai to’o hetan projetu. Nune’e mós, iha projetu single source nian, kompañia ne’ebé hetan projetu tenke prenxe kritériu. Maibé, realidade ne’ebé akontese dala barak la iha transparénsia. Tanba, iha interese familiarizmu no interese partidária.

Hataan ba situasaun hirak ne’e, Diretór kompañia Caimaleloqui Unipesoal Lda, Rui Castro hateten, projetu single source dala barak la iha transparénsia no ida ne’e sempre akontese. Tanba, iha pakote família no pakote eleisaun nian.

“ha’u hanoin ita labele ko'alia kona ba transparénsia. Tanba, iha prosesu ida ne’e la hala’o publikasaun. Ne’e duni, la uza Lei mós ita la bele ko'alia kona ba transparénsia, tanba automátika la iha ona transparénsia 100%.” esklarese Rui.

Nia haktuir, iha tinan 2009 Governu kria Projetu Pakote Referendum (PPR), depois pakote PDD 1 no PDD 2. Maibé, besik eleisaun, mosu fali pakote ida ho naran pakote família no pakote eleisaun. Pakote eleisaun no família ne’e la hala’o publikasaun hanesan pakote PDD 1, PDD 2 no PPR.

Maibé, husi pakote sira ne’e hotu, hetan lukru boot mak pakote família no pakote eleisaun. “pakote eleisaun ne’e komesa entrega iha fulan Janeiru, liu husi titipan budget  ne'ebé akontese hodi nune’e projetu hotu bele tama iha partidu polítika sira nian no ida ne’e akontese iha 2012.

Nune’e mós, iha pakote família ne’e hamosu barter  iha  Governu  AMP. Ezemplu, Ministru A fó projetu ba família Ministru B nian. Tanba, iha Lei hatete Ministru A nia família la bele kaer projetu ne'ebé fó husi Ministru A. Ne’e duni, sira hamosu pakote família ba barter. Tanba, iha prosesu ne’e sei akontese troka projetu ba malu entre família Ministru” akuza Rui hanesan deskonfia hela servidór estadu balun.

Tuir Rui, transparénsia bele akontese bainhira prosesu hotu tuir prosedimentu normál hanesan haktuir iha ukun fuan Lei aprovizionamentu.

Molok taka ninia liafuan emprezáriu timor oan ne’e ho fiar an hateten, emprezáriu balun ne'ebé hari kompañia tanba nia partidu ukun hela ou nia família tuur hela iha instituisaun estadu no governu nian hodi hein de’it projetu. Maibé, la iha planu konserteza kompañia ne’e sei monu no kompañia nia lala'ok la tuir ninia hakarak. Tanba, bainhira ninia partidu tun ou nia família sai husi instituisaun estadu nian, entaun ninia kompañia mós monu no la’o. Maibé  se nia uza tempu hirak ne’e ho di'ak no buka aprende husi projetu ne'ebé nia hetan mak nia kompañia sei eziste nafatin no nia sei sai emprezáriu professional.

Nune’e mós, Deputadu Inácio Moreira husi Bankada Fretilín haktuir, iha prosesu ida ne’e kompañia tenke iha finance kapasity, iha office no tenke prenxe kritériu. Maibé, dala ruma balun la iha. Tanba, sira buka hatudu malu de’it.

“ha’u hanoin ita presiza hala’o investigasaun ba kompañia ne’ebé foin hari iha 2011. Maibé, hetan ona projetu. Ita presiza hatene kompañia ne’e se nian, oinsá ho ninia ekipamentus no kompañia refere iha kapasidade ou lae. Tanba, se lae buat hotu la la’o di’ak” Deputadu partidu istóriku ne’e kestiona.