PARTE IX : 20 AGUSTO LORON FALINTIL SE MAKA FUNDADOR FALINTIL?

20. Susar oi oin ne’ebe Kompanhia ida idak iha

Caetano Guterres Maulory

Husi kompanhia selu seluk sira nia problema barak maka kona ba oin sa atu hatene lolos se maka simpatizantes UDT nian no se maka simpatizantes Fretilin nian. Maibe iha kompanhia DSM hakerek nain nian maka iha problema boot teb tebes ida, kona ba kilat sira. Tan ba kilat sira ne’e iha tiha hotu ona iha kaixote laran ho masa ba kilat nian, buat ida hanesan gordura ida no oleo, wainhira kilat sira ho estado ida hanesan ne’e ita tiru ladiak. Kilat sira ne’e prega metin ho pregos bo boot deit, i hada husi rai too uma nia kakuluk. Wainhira ita hatun para atu hamos ne’e ema hatene kedas.

Maibe ami tenke buka dalam atu hamos duni kilat sira ne’e hodi pronto tula iha kamioneta sira lori ba iha QG atu bele fahe ba kompanhia selu seluk. Tenke estuda distancia tempu entre horas operasaun nian, fahe kilat nian, no kareta halai husi DSM ba QG nian, ne’e tenke bem estudado ho estrategia oi oin. “ maun alin sira  fo naran ba buat ida ne’e lakusta buat ida, kusta teb tebes maka ema ne’ebe halo plano no enfrenta dificuldade oioin. Kuando too tiha ona iha vitoria ida idak koalia mesak funan funan no rebo rebo deit, hanesan ita asiste ema tebe bola. Ita be asiste ne’e dala ruma koalia barak los,  ohin podia passa ba ida ne’eba ou ohin podia remata” maibe tama took ba kampu laran dala ruma nia tebe mos keta labele karik?”. Buat ne’e mais ou menos nune!.(Hakerek badak deit, resumido).

21- Hakerek nain konsegue evita plano husi komandante João Branco atu forma  governo militar wainhira dezarma ona UDT sira.

          Tan ba sa maka komandante João Branco halo tuir ideia hakerek nain nian, para labele forma governo ho sistema militarista. Tan ba eis tropas DSM nian tomak ne’e organizado tiha ona, husi hakerek nain no kolaboradores sira hakerek nain nian hanesan primeriu mak komandante Germano Lobo alias Maulemo, segundu mak eis komandante Rafaiel Cabral alias Lalora, no eis komandante António da Costa alias Terra Bulak, tuir mai eis komandante Pedro Braga alias Piter, Sr. João da Costa, ho sira selu seluk tan, antes de João Branco no Adão Cristovão sira tama iha kompanhia DSM. Molok sira nain 2 tama mas iha DSM, eis tropas DSM nian 99,99% sai tiha ona hanesan militantes no simpatizantes FRETILIN nian. Ne’e duni João Branco sempre rona opiniaun hakerek nain nian. 

Razaun ida seluk tan ba eis tropas sira iha DSM rona liu hakerek nain tan ba ami maka organiza sira directamente, tan ba ami nia simpatia ba malu, tan ba ami lao hamutuk kleur ona, han hemu hamutuk no halo agitasaun ba kompanhia selu seluk iha Dili laran hodi kanta FOHO RAMELAU hamutuk, fo volta Dili laran hamutuk ho sira, molok João Branco no Adão  sira tama iha DSM. Razaun ida seluk tan ba hakerek nain maka responssavel ba armagem kilat nian, i iha xave armagem nian, maibe sorte mos tan ba maun Xanana nia orietasaun ne’ebe fo ba hakerek nain iha sorumutu ne’ebe koalia tiha ona iha pontu No.17 leten ba.

22. Xanana UDT sira kaer tiha ona ba Palapasso

Liu tiha sorumutu ho governador ne’e hakerek nain ba fali dala ida tan iha sede FRETILIN atu hasoru malu ho maun boot Xanana no lori ho Pistola metralhadora UZI ba maun bo’ot Xanana ho kilat musan. Maibe wainhira hakerek nain to’o iha ne’eba maluk ida dehan katak maluk sira UDT ba kaer tiha ona nia, baku nia, tebe nia no tafui kaben ba Xanana nia leten futu metin nia no lori tiha ona ba Palapasso, hakerek nain fila ho laran triste teb tebes.(Hakerek badak deit, resumido).

23.Sorumutu dala ikus iha QG

Ultima reuniaun iha 19 de Agosto atu fahe pozisoeins ba kompanhia ida idak, tuir declarasaun ne’ebe Eis Primeiro komandante Geral das Falintil Rogerio Lobato halo tiha ona, i hakerek ona iha jornal  Timor Post iha antes de eleição presidencial  iha Fulan Marco 2012 nia laran  iha ne’ebe Sr. Rogerio ko’alia kona preparasaun atu dzsarma malae mutin sira atu Timor bele ukun rasik an. Sorumutu ikus liu ne’e  halo iha Quartel Geral, iha bar soldados sira nian. Iha oras ne’eba ema ne’ebe hein netik  odamatan maka Sr. Benjamin Cabeças alias komandante Tubarão, ne’e naran nebe wainhira funu iha ailaran, (sei moris iha Atauro), nia mak halo konta iha bar dos soldados. Iha bar ne’e nia laran husi kotuk iha fatin luan bo’ot ida para atu bele  rai sasan nian, “gudan”, entaun ami ba halo finge tur atu hemu buat ruma. Hafuhu ba mai malae sira la iha, maka  ami tama tiha ba laran, ida por ida, hanesan ne’e too ami tama hotu iha ne’eba, maka Ckmandante Rogerio fahe pozisoeins ho ultima rekomendasoeins etc. Etc.(Hakerek badak deit, resumido).

24. KONTRA GOLPE

To’o ona horas atu halo kontra golpe HOSI FORSAS ARMADAS DA DEFESA DO POVO MAUBERE SIRA, ami nia laran kontente teb tebes tan ba buat ne’ebe ami prepara ho susar teb tebes bele sai realidade ida. Kalan kilat tarutu to,o dadersan, maibe povo sira la hatene lo los. Povo nia hanoin nee’ forças UDT sira maka tiru, so wainhira too ona dadersan ami komesa ona kanta Foho Ramelau no Avante p’ra Vitória Timor-Leste ho bandeira FRETILIN maka povo foin hakfodak. Entaun povo Dili laran tomak, laran kontente teb tebes, hot hotu ba oferece voluntariamente iha QG atu simu kilat ho fardamento. Maibe Sr. komandante Rogerio fo deit nota ida no sira mai iha DSM, hakerek nain ho Jermano Lobo alias Mauleno no sira selu seluk halo konta fahe kilat deit, dader to’o fali iha kalan. Senhora sira halo kafe cha no pao lori voluntariamente fo han ba forsas armadas sira ne’ebe kontrola iha dalan dalan sira etc. Etc.(Hakerek badak deit, resumido).

225.Insucesso 25% iha kontra golpe

Wainhira halao kontra espionagem para atu detekta se se maka simpatizante UDT nian, maka iha ne’e kompanhia balun hanesan PM maka sala uituan, lo los nee maluk UDT sira ami kaer moris deit, tan ba iha plano ne’e ami hakarak atu cerka UDT deit, obriga para sira atu entrega kilat deit, i evita para labele  iha ran ida maka nakfakar. Tan ba hatene katak buat hirak ne’e politika nia lalaok, maibe sira iha PM la konsegue detekta sira ne’ebe pro UDT, tan ba nee maka ami nia maluk policia nian balun maka dezarma fali tiha koordenadores sira balun hanesan Guido Guterres no selu seluk i sira lori kilat ba adere tiha ba UDT, tan ba ne’e maka lideres UDT nia konsegue halai liu ba fronteira, maibe ikus mai PM nia operasaun maka sucesso teb tebes etc etc..(Hakerek badak deit, resumido).

26. Mobilizasaun geral Milisia Popular Fretilin nia

Iha 20 de Agosto, ami forças Armadas uituan deit la to’o para atu kontrola territoriiu tomak. Ne’e duni ami komesa mobiliza massa Fretilin atu kaer kilat, Milisia da Fretilin, barak maka mes mesak ba apresenta an iha QG para simu kilat, liu liu sira husi Quintal Boot nian kuase mane sira ne’ebe sei bele kaer kilat sira ba apresenta an atu simu kilat iha dadersan nakukun deit. Sira barak maka ikus mai tahan iha ailaran to’o tinan 24, no oras ne’e sei iha F/FDTL, iha ne’eba maka Sr. Rogerio Lobato fo ordem para sira ba simu kilat iha kompanhia DSM husi hakerek nain no eis komandante Germano Lobo no maluk selu seluk ne’ebe ajuda fahe kilat, fardas ho kilat musan.(Hakerek badak deit, resumido)

27. Hakerek nain sai hanesan CONSELHEIRO MILITAR

Komesa husi 20 de Agosto ba too 7 de Dezembro, hakerek nain sai hanesan konselheiro military. Hakerek nain nia servisu maka kontrola kilat sira, ho sasan funu nian selu seluk. Depois ba informa ba Sr. Rogerio Lobato servisu hot hotu ne’ebe kona ba material funu nian, no fo hanoin hetan ba komandante Geral das Forças Armadas da Defesa do Povo Maubere oin sa tenke fo ordem para labele tiru rajadas arbiru deit ba leten, tuda granadas de funu, grandas aisuar nian arbiru deit, tan ba iha ne’eba kedas ami hatene ona katak funu ne’e sei naruk, i Sr. komandante Rogerio mos aceita hanoin sira ne’e no haruka hakerek nain duni ba kontrola kilat no kilat musan sira iha Timor laran etc etc..(Hakerek badak deit, resumido).

28. FORSAS ARMADAS DA DEFESA DO POVO MAUBERE, MUDA NARAN BA FALINTIL

28. a). 20 de Agosto maka mosu naran FALINTIL. Wainhira Comite Central da FRETILIN, husi Aileu to’o iha Dili, hanesan saudoso Nicilao Lobato, Dr. Mari Alkatiri no selu seluk, maka muda fali naran ida Forças Armadas da Defesa do Povo Maubere ne’ebe ami funda uluk kedas ona ba fali FALINTIL. Maibe iha momento ne’eba hakerek nain fahe kilat namanas ba Milisia Popular Fretilin nian, ne’e duni la hare ho matan no la rona ho tilun, iha oras lokraik loron ida ne’eba duni, maka komandante Geral Rogerio Lobato fo hatene ba hakerek nain katak, Naran FORÇAS ARMADAS DA DEFESA DO POVO MAUBERE muda fali ba naran Forças Armadas da Libertção Nacional de Timor-Leste, FALINTIL!. Komandante Rogerio dehan katak saudoso Presidente Nicolau Lobato no Sr. Mari Alkatiri maka fo naran FALINTIL ne’e, I Rogerio mos aceita naran ida ne’e iha momento ne’eba, hakerek nain doko ulun no hatete ba Sr. Rogerio katak naran ida ne’e kapas liu tan i koresponde duni ba situasaun aktual ida ne’eba etc etc. (Hakerek badak dei, resumido).

“Istoria kompletu FALINTIL nian, oin sa nia moris ho nia fases hot hotu, husi moris ho nia hahaluk asswain nian, ho nia trasformasaun sira, mudansas no restruturasaun sira iha nia fases istoria Timor-Leste nian ne’ebe dificil teb tebes durante tinan 24 nia laran, husi 20 de Agosto 1975 to’o 30 de Agosto 1999, imi sei le’e iha hakerek nain nia livro ida intitulado “O HEROI LEGENDÁRIO DO LEVANTE, SALVADOR E LIBERTADOR DE TIMOR-LESTE” hakerek ho verso ho setilo “Majestoso e sublimado” ne’ebe sei halo laçamento iha tempo badak nia laran”.

“Istória kompleta oin sa Forsas Armadas da defesa do Povo Maubere moris i muda fali naran ba iha FALINTIL, imi sei le iha hakerek nain nia livro ida intitulado“ EM MEMORIA DA MINHA PEQUENA PARTICIPAÇÃO NA LUTA DA LIBERTAÇÃO DE TIMOR-LESTE”. “ escrita em prosa” hakerek ho prosa ne’ebe sei publica iha tempo badak, ne’ebe komesa koalia husi wainhira halo organizasaun klandestina atu forma Forças Armadas da Defesa do Povo Maubere husi 1974, halai ba ailaran, tun ho orientasoeins Kay Rala Xanana Gusmao, hamosu organizasaun klandestine primeiro ho Pe. Filgueiras, Bispo D.Martinho Lopes ho maluk selu seluk, kaer tama kadeia, desterra ba Cipinang, sai husi kadeia kontinua servisu etc, to,o 30 de Agosto de 1999 etc.etc”.(Hakerek badak deit, resumido).