Grupu Jovens Konfrontu iha Merkadu Hali Laran Koko Ataka ETO

Tempo Semanal - Dili 27/10/2012

Grupu jovens balun involve iha tuda iha merkadu halo laran hodi afeta. Grupu sira ne’e sira ataka malu hodi ikus mai koko tama iha estasaun mina Esperanca Timor Oan ne’ebe lokaliza besik merkadu halilaran ninia sorin.

“Ema koko atu tama ba iha sunu fatin ne’eba mas sorte bee seguranca oan ne’e ho maluk balun mak koko salva. Sorte sira la konsege sunu. Maibe karik sunu duni entaun problemas bo’ot ba komunidade sira ne’e uma besik iha ne’e no bele foo impaktu mos ba igreija Balide” dehan komunidade ne’ebe hela besik iha halilaran ne’ebe dehan ninia naran Agus.

Iha parte seluk nia haktuir katak akontecimentu ne’e lori oras lubun ruma maibe la iha atuasaun husi PNTL.

“Triste uitoan jovens sira tuda malu to’o besik oras mas la iha PNTL ida mak mai atu halo intervensaun ruma. Ha’u haree kolega ida koko telefone ba numeru ne’ebe biasa sira dehan iha problema karik telefone ba ne’e maibe la iha ema ida maka foti telefone,” nia haktuir ho laran susar.

Tuir Agus ne’ebe metade idade ona ne’e dehan kus-ikus ne’e kazu asaltu malu entre jovens iha capital Dili hodi ba to’ok iha distritu balun iha nasaun ne’e  hodi estraga ema nia uma ate halakon ema nia moris hanesan kazu ne’ebe mosu iha loron uluk semana ne’e iha Distritu Likuica mak hamate joventude ida.

“Ha’u hanoin di’ak liu instituisaun estadu ninian presiza foti dezisaun forte hodi bele atua ba situasaun ne’e. Ita nia lei ne’e halo jovens sira barani kreia problema ne’e mak la di’ak. Ita lalika tauk demais justica ho direitus umanus tan baa mi sira be komunidade ne’e mos iha Direitu atu moris hakmatek la’os labarik sira lanu tiha halo problem aba komunidade sira,” Agus ko’alia ho oin seriu.

Agus hanesan populasaun simples ida ne’ebe la iha ligasaun ho problema refere no nia la iha ligasaun ho ETO sente triste tebes ho akontesimentu ne’ebe mosu hodi kalan iha merkadu Hali Laran ne’e.

Tuir Observasaun membru PNTL sira foin maka to’o iha fatin hodi halo investigasaun.