PARTE III : Nepotizmu Iha Konstrusaun Jardín Lesidere Deskonfia Kompañia Uza Sasan La Tuir BOQ

Largo Lecidere (Photo Tempo Semanal)

TEMPO SEMANAL - DILI, 27/10/2012

JARDIN Lesidere ne’ebé agora koñesidu ho naran LARGO DE LESIDERE ninia imajen kapás no furak tebes. Maibé, sasan sira ne’ebé uza iha Jardín ne’e barak la iha kualidade di’ak. Liu-liu kanu (besi) ne’ebé monta iha karreta nia para fatin. Tanba, kanu hirak ne’e balu komesa tohar no kle'uk fali ona.

“ha’u hanoin kanu sira ne’e solda de’it. Ne’e duni, bainhira karreta enkosta kois de’it mós tohar arbiru no kle'uk kedan. Ida ne’e hatudu momoos katak, mosu korrupsaun. Tanba, dala ruma sasan ne’ebé kompañia sira uza la tuir BOQ ne'ebé iha. Maibé, sira sosa fali sasan ne’ebé la iha kualidade, ne’e duni sasan balu komesa at fali ona:” haktuir Deputadu Inácio Moreira.

Antes ne’e, Deputadu Inácio kestiona ho kualidade konstrusaun Jardín LARGO DE LESIDERE iha uma fukun Parlamentu Nasionál. Ne’e duni, nia parte sujere hala’o investigasaun ba kompañia ne’ebé kaer obra ne’e, hodi nune’e bele hatene katak, kompañia ne’e iha espesifikasaun ou lae. Tanba, dala ruma iha prosesu aprovizionamentu nian tomak, sira ida-idak aprezenta dezeñu no ida ne’e mak sai hanesan problema boot.

Deputadu Bankada Fretilín, Inácio Moreira ne’ebé sempre kestiona mós kualidade konstrusaun Jardín LARGO DE LESIDERE hateten, nia parte sei la ko'alia katak,  kompañia ne’e Diretór nia oan nian ka se nian. Maibé, hakarak dehan de’it, konstrusaun Jardín ne’e la iha kualidade.

“Se konstrusaun ne’e la iha kualidade, ha’u hanoin ita presiza hala’o investigasaun ba kompañia. Tanba, Ita presiza hatene kompañia ne’e se nian, oinsá ho ninia ekipamentus no iha kapasidade ou lae. Tanba, iha prosesu ida ne’e kompañia tenke iha finance kapasity, iha office no tenke prenxe kritériu.” Moreira kestiona.

Responde kona ba fasilidade Jardín Lesidere ne’ebé ninia kanu balun tohar fali ona, Diretór Aprovizionamentu Ministru Komérsiu, Gaspar Poli Cargo Coreia hateten, kompañia tenke hadi'a fali sasan hirak ne’ebé aat. Tanba, ida ne’e sira ninia responsabilidade.

Klaru katak, konstrusaun ba obra ne’e remata ona. Maibé, sira sei iha osan 10%  mak seidauk hala’o pagamentu, ne'e duni sira tenke hadi'a sasan hirak ne’ebé aat antes atu hala’o pagamentu ba osan 10 % ne’e. “iha kontratu ko'alia klaru kona ba 'garansia'. Ne’e duni, karik sasan ruma mak aat molok to’o fulan ne'ebé determinadu, kompañia tenke hadi'a” konfesa Gaspar.

 Diretór ne’e husu mós ba komunidade sira, liu-liu hirak ne’ebé loro-loron ba iha Jardín LARGO DE LESIDERE atu kuidadu fasilidade iha Jardín ne’ebá, labele estraga no presiza ita hotu nia konsensa atu kontrola.

 Diretór kompañia Crisfanbor Unipesoal Lda, Basílio F. Miguel dehan, kona ba sasan balu ne'ebé komesa aat fali ona ne’e, responsabilidade kompañia nian no tuir akordu ne’ebé iha durante fulan neen karik sasan ruma aat kompañia prontu hadi'a. Tanba, orsamentu 10 % mak seidauk hala’o pagamentu.

 “liu husi fulan neen kompañia la iha ona responsabilidade ba sasan hirak ne’ebé mak aat. Maibé, agora daudauk ne’e sei iha hela kompañia nia responsabilidade.” esplika  Diretór kompañia ne’e.

 Estudante Universidade Nasionál Timor Leste (UNTL), Miguel Lopes ne’ebé sempre asesu ínternet iha Jardín LARGO DE LESIDERE haktuir ba Tempo Semanál katak, konstrusaun Jardín Lesidere seidauk to’o tinan. Maibé, tansá..? sasan balu komesa aat fali ona.

 “Ha’u hanoin sasan sira ne’ebé at daudauk ona ne’e, kompañia tenke toma responsabilidade hodi hadi'a fila-fali. Nune’e mós, kompañia tenke garantia sasan hirak ne’e ninia kualidade, se lae la to’o tinan sasan sira ne’e aat hotu fali ona.” dehan estudante UNTL ne’e.