DILI CIDADE DE PAZ NE'EBE NUMERU KRIME IKUS IKUS NE'E AUMENTA

Tempo Semanal-Dili 30/09/2012

Ikus-ikus ne’e kriminalidade numeru sa’e iha cidade de Paz capital Timor Leste. Husi ema sa’e motor hodi sona ema iha dalan ninin capital ninian too oho membru F-FDTL ida iha Kintal Boot. Hahu husi koko nauk iha fatin sagradu igreija Motael too oho fali ema iha Bairopite iha kalan 29/09/2012.

Joni Alves Quintao ninia moris hakotu husi grupu balun iha besik fatin ne’eba tan ba deskonfia odiu malu arte marsias ninian. Joventude ne’ebe moris iha Ainaro Hatubuiliko iha loron 01/06/1988 ne’e tenke lakon ninia moris husi aksaun violentu ne’ebe autoridades PNTL sira to’o ohin lakon ninia kbiit atu atua.

Kazu refere akontese tiha testamunia sira tauk atu foo informasaun tan ba autoridades mos la garantia sira nia seguranca.

Familias Matebeian husu atu autoridade lei ho ordem bele kaptura suspeitu sira hodi lori ba tribunal. Maske nune’e familias mos lamenta ho atuasaun tarde husi parte seguranca satan investigasaun. Sira hein kleur maka autoridade sira halo kontaktu. 

Iha parte seluk membru PNTL sira ba halo atuasaun tarde tan ba lakohi simu konsekuencia husi Lei. Kuandu sira atua sala no la atua mos sala. “Ami ba atua maka ema kanek ka mate ami maka hetan fali kastigu nune’e duni ami ba mas sempre tarde tan ba izemplu maka kazu Delta Nova no liu-liu Hera. Kazu Hera ne’e komandante jeral dehan katak zero tolerancia maibe kuandu acidenti mosu ami nia membru sira maka ba hatan. Ne’ebe dala  barak ami ba tarde ne’e di sengaja,” dehan membru PNTL ida husi stasaun PNTL ida iha Dili ba Jornal ne’e.

Membru ne’ebe husu atu labele publika ninia naran ne’e dehan katak, “kuandu imi rona HT hateten lima belas minit ka lima minit merapat ne’e keta laran metin. Diak liu imi maka para rasik ou imi mak oho malu.”

Iha akontesimentu ida iha Maleuana iha momentu balun liu ba husi operasaun bolu ba stasaun Komoro atu ba atua kazu baku malu iha fatin refere maske dehan minute lima sira too ona iha fatin maibe hein ba hein liu tiha oras ida mos polisia husi ai mutin ladauk ba to’o baku malu para ona mak sira to’o.