MINISTEIRU FINANCAS HILI AJENCIA HODI SAKRIFIKA ESTUDANTES TL IHA INDIA CNRT HAKILAR EMILIA

Tempo Semanal-PN, 16/10/2012

Timor Leste hasoru dezafius ba problemas rekursus umanus hanesan ministra financas rasik rekuinese iha ninia resposta ba perguntas husi deputadu sira iha plenaria parlamentu durante de diskusaun orsamentu ratifikativu nune’e mos governu Timor leste decide edukasaun hanesan prioridade nasional ida.

Governu halo esforsu haruka bolseirus barak ba estuda maibe dala balun husik futuru lideranca nasaun ninian sira ne’e abandonadu iha problemas laran hanesan situasaun ne’ebe mosu ba estudantes Timor oan lubun ida ne’ebe ministeiru financas haruka ba buka matenek iha India. Nune’e representante povu iha uma Fukun Parlamentu Nasional, Brigida de Coreira husi bankada CNRT litik ministra Financas, Emilia Pires ne’ebe tu’ur iha liman karuk Primeiru Ministru durante (16/10) debate orsamentu rektifikativu ba Ministeiru palnu Financas kona ba asuntus bolseirus ne’ebe ministeiru refere haruka ona ba India la’o lori fali matenek mak mai maibe hamosu fali problemas tan ba universidade sira la simu bolseirus Timor oan tan la rekuinese ajencia ne’ebe ministeiru financas uza.

“Ha’u hakarak husu esklarecimentu de’it ba ministra financas kona ba bolseirus. Tan ba ohin temi kona ba bolseirus entaun ha’u mos hakarak husu bolseirus ne’ebe uluk miniteiru financas haruka ba india. To’o iha ne’ebe sira hetan sa ida, maibe to’o tinan ida I ikus mai sira labele tama universidade tan ba ajencia sira ne’ebe hodi sira ba iha ne’eba universidade sira la rekuinese ajencia sira ne’ebe hodi sira ba. Agora daudauk sira fila ona mai Timor. Ha’u hakarak husu halo nusa sira nia prose ba oin?” kestiona Brigida.

Liu tan Brigida akresenta katak Estudantes sira ne’e sai vitima ba lala’ok ne’ebe naksalak. “Sira sai korban ba prosesu sira ne’e. I agora ba oin sir abele eskola ga la’e. Tan ba sira nia inan aman sira mos preokupa ho situasaun sira ne’e,” realsa Brigida.

Ministra financas hatan kona ba kestaun refere maske la esplika detalladu kona ba prosesu ajencia ne’ebe ministeiru financas foo fiar mas universidade sira la konfia. Maibe ministra Emilia pires rekuinese estudantes sira ne’e prefere fila hikas mai TL.

“Estudante sira ne’ebe ami haruka ba india por akazu wainhira sira foti problema ida ne’e ami haruka kedas team id aba ne’eba para haree I investiga sira nia situasaun,” informa Emilia.

Ministra ne’e esplika katak ninia parte, “foo mos oportunidade ida ba sira atu hili hakarak hela ga la’e. Sira foti desizaun katak sira hakarak, sente traumatiza tiha ona, hakarak fila fali mai. “

Maibe Ministra Financas dehan ninia ministeiru la garante atu universidade sira sei simu nafatin estudantes sira ne’e no futuru nasaun sira ne’e tenke hahu fali husi inisiu buka sorte ho Timor oan sira seluk wainhira governu loke fali oportunidade seluk.

“Se karik ita bo’ot sira hakarak fila fali mai timor, tenke hahu fali, tenke kompete fali ho Timor oan sira seluk, kuandu bolsas estudu governu loke ita bo’ot sira tenke tuir tan ba ami la garante atu hatama ita bo’ot sira ba universidade, ami la iha kb’it ba ida ne’e, ami labele influencia universidades,” ministra financas hasaran informasaun ne’ebe ninia parte foo hatene ba estudantes sira ne’ebe daudaun ne’e buka hela esperiencia iha ministeiru financas.

Kazu estudantes Timor oan ne'ebe abandona iha India hahu nakloke ba publiku wainhira iha vizita ida ne'ebe kompostu husi SEPI, SEFOPE, Ministeiru Financas, paralementar, universidade nasional no mos grupu sociedade civil balun ba tuir estudu orsamentu sencivel ida iha India.