Tuesday 30 October 2012

UNITAL Hetan Reitór Foun




Estudante husi Universitariu UNITAL
 halibur hamutuk iha sala konferensia hodi
 rona esplikasaun husi
 Fundador sira. Foto/ts/Leonito
Tempo Semanal - Dili, 30/10/2012

MEHI Estudante Universitáriu Orientál Timor-Leste (UNITAL) hodi troka Reitór interinu hetan ona resposta. Tempu badak Universidade ne’e sei hala’o tomada de pose ba Reitór foun. Kargu Reitór ne’e sei assume husi Dr. Roberto Reis Miranda.

Rezultadu troka Reitór interinu mai husi asaun pasifiku ne’ebé hala’o husi estudante UNITAL durante loron tolu nia laran. Tanba, iha asaun ne’e estudante sira ejize mós ba parte Fundasaun atu hare Reitór interenu ne’ebé mak durante ne’e la hala’o ninia knaar ho masimu. Desizaun ne’e mai husi Presidente  Fundasaun Asuwa'in Timor-Leste (FUNATIL), Lere Anan Timor.

Presidente FUNATIL foti inisiativa ida ne’e, tanba Reitór interinu ne’ebé universidade fó fiar la hala’o ninia funsaun ho másimu. Pior liu tan, reitór ne’e abandona serbisu retórial.

Agora daudauk iha ona Reitór foun ne’ebé sei hare serbisu akadémiku nian. “imi iha ona Reitór foun no hein fó de’it seremonia tomada de pose iha tempu badak nia laran. Ha’u fiar nia sei hala’o serbisu ho di’ak no nia sei hamriik iha pozisaun hanesan Reitór hodi rona saida mak imi hakarak” dehan eis gerileiru FALINTIL ne’ebé asumi kargu nu’udar Presidente Fundasaun, Lere Anan Timor  hafoin hasoru malu ho estudante UNITAL iha loron, 11 Outubru 2012 hodi ko’alia kona ba problema universitariu nian.

Iha loron ne’e, Presidente Fundasaun husu ba estudante UNITAL tomak atu estuda didi’ak para bele hetan futuru ne’ebé di’ak. Tanba, rai doben ida ne’e presiza hela sira nia tulun.

Roberto Reis Miranda ne’ebé iha tempu badak sei simu pose nu’udar Reitór iha UNITAL hateten, nia parte agradese tebe-tebes ba Presidente Fundasaun ne’ebé fó fiar ba nia atu hadi'a jestaun universidade nian. “maski kargu ida ne’e todan. Maibé, ha’u tenke simu tanba fatin ne’e atu fó formasaun no aprendizajen ba futuru nasaun Timor-Leste nian.” dehan Miranda.

Miranda promete katak, durante ninia mandatu, sei esforsu hodi buka hatene saida mak Universitáriu presiza atu halo no sei identifika problema saida mak durante ne’e fakuldade hasoru. Nune’e mós, nia parte sei esforsu atu buka solusaun hodi bele kompleta saida mak Universidade seidauk iha”
Tuir Miranda, ko'alia kona ba vida akadémiku, la'ós atu ko'alia kona ba empreza ruma. Maibé, ko'alia kona ba ema nia vida no atu forma ema sai matenek. “atu kapasita estudante ho kualidade ita presiza mós profesór ne’ebé hanorin ho kualidade.” Esklarese Miranda hodi taka ninia liafuan. (**)


No comments: