Saturday 27 October 2012

Komunidade Ermera Husu Taka Jogus Pihlweb


Tempo Semanal - Dili, 26/10/2012

Kualkér Jogus Iha Distritu Ermera Sei La Tolera. Tanba Kria Ona Tara Bandu”
TUIR- Amu Parókia Ermera Lorenso hateten, igreja iha responsabilidade morál. Tanba, Komisaun Organizadora Tara Bandu Servisu hamutuk ho Igreja Atu hare Asuntu tara Bandu. Parte igreja iha obrigasaun atu tau matan ba sarani hotu-hotu. Hare ba e ema ne'ebé Kontra lei Tara Bandu iha terenu. Kompeténsia Polisia mak kontrola Tara Bandu hodi hala'o Motorizasaun iha baze.

Kopia Passaporte Country Director Phil web
 Mazy ne'ebe uza vistu turista mak servisu iha nasaun ne'e
maibe SEPFOPE, PNTL Imigrasaun, MNEC husi parte Konsular
 labele foti medidas ruma tan ba tuir informasaun katak
 lider CNRT ida ho naran Germano iha socio mais ou
menus 30% iha komapnia ne'e ninian laran nune'e
duni duvidas atu bele halo tuir tara bandu iha ermera
Amu Parókia Ermera mós husu ba komunidade sira ne'ebé  hahú fa'an kupon husi jogu Pihlweb iha Gleno sei la tolera sira tama tanba kria ona tara bandu. “Too agora ha'u seidauk rona informasaun husi seguransa. Tanba, durante ne’e igreja luta makas hodi la bele loke tan kualkér  jogus iha distritu Ermera tenke taka. Maibé, Jogu balu hahú loke ona. Ha'u presiza halo koordenasaun ho seguransa Tara Bandu nia bele identifika sira loke duni jogu ne'e ka lae.? Karik,iha duni sira tenke foti medida no ha'u rasik sei tun diretamente hodi taka jogu hirak ne’e,”tenik Amu Parókia ba Jornál Tempo Semanál liu husi via telefone.

Nune’e mós vice Presidente Komisaun Organizadora Tara Bandu Distritu Ermera  kaer kargu mós hanesan xefe suku Gilimea, Pedro Madeira  esplika kona ba tara Bandu iha distritu Ermera hahú iha fulan Fevereiru 2012-2016 hetan legalidade husi governu no igreja ne'ebé mak loke abertura Tara Bandu tempu ne'ebá husi Presidente Ramos Horta no Bispu Dioseze Dili.

“Iha  tara bandu ne’e,  kria  lei oan ne'ebé define mós iha tara bandu hanesan relasaun ema ho natureza. Ne’e duni,  kualkér jogu la bele loke iha distritu Ermera no Redús mós kostume. La'ós halakon, maibé  redús povu nia mukit. Maski povu servisu nu’udar  traballadór. Maibé, ita hakarak sira han hanesan liu rai” dehan vice Presidente Tara Bandu ba Jornal Tempo Semanal iha knaar fatin, distritu Ermera.

Vice Presidente Tara Bandu hato'o mós informa katak, jogu Pihlweb ne'ebé ema estranjeiru fa’an iha Distritu Ermera liu husi kios.. “Ami sei foti medida no sei buka evidénsia hodi taka jogu ne’e. Tanba, fulan ualu ona la iha tan jogu. Maibé, derrepente jogu Pihlweb mosu hodi kontra lei tara bandu” esplika nia ho hirus.

Nia dehan, tuir informasaun Jogu ne’e komesa buras. Maibé, seidauk halo observasaun diretamente ba iha baze liuliu seguransa Tara Bandu identifika dunik sei koordena ho PNTL foti medida ida hodi taka no fó sansaun tuir lei Tara Bandu no sei la tolera ba ema ne'ebé mak hakarak kontra lei Tara Bandu.

Objetivu komunidade distritu Ermera lakohi atu loke kualkér jogu iha fatin ne’e. Tanba, komunidade barak la rai osan. Ne’e duni, kualkér jogu tenke taka tanba povu Ermera barak moris ho Agrikultura presiza rai osan.

Kestaun ne’e, hato'o mós husi komandante PNTL Distritu Ermera, Arnaldo Araújo hateten, jogu Pihlweb ne'ebé komunidade Gleno fa’an iha Distritu Ermera. Tanba Kompañia na'in Pihlweb diretamente hato’o rekoinesementu ba PNTL hafoin Pihlweb loke no sira mós hetan akreditasaun husi Ministériu Turizmu.

Tara Bandu iha lei balun ko'alia kona ba la bele loke kualkér jogu hanesan mós rezolusaun Primeiru Ministru hatún iha tinan kotuk liu husi konsellu Ministru katak, Bandu ba jogu bola gulin kuru-kuru la bele loke tanba bele afeta ba estabilidade.

Agora Jogu Pihlweb ne'ebé eziste iha Distritu Ermera, “ ami la iha kompeténsia atu taka. Tanba, sira halo rekonesementu. Maibé, oinsá jogu ne’e bele taka agora dependénsia makas husi komunidade sira nia partisipa ba jogu ne’e karik sira nia partisipasaun la iha konserteza jogu sei taka de'it.
Karik, komunidade balun kestiona kona ba jogus ne’e,  relasiona ho Tara Bandu kualkér jogu la bele loke. Maibé jogu ne’e modernu no hetan lisensa husi órgaun kompetente.

Hare ba jogus Pihlweb ne'ebé komesa hetan reasaun husi parte igreja no Komisaun Tara Bandu inklui mós komunidade distritu iha Gleno. Tuir administradór Distritu Ermera Vitorino da Costa hateten,  jogus Pihlweb ne'ebé tama iha Distritu Ermera hanesan modelu SDB ho folin  dolar ida  komunidade Gleno balu fa’an.

Maibé, komunidade sira too agora hato’o informasaun kona ba Jogu ne'ebé loke seidauk hato'o mai no jogus Pihlweb mós too agora seidauk halo rekonesementu ba autoridade lokál. Tuir informasaun sira halo rekonesementu ba de’it iha parte PNTL Gleno.

“ Ha'u seidauk bele dehan, Jogus ne’e, ilegál ka ou legál. ? Tanba, seidauk hatene loloos ninia Tipu Jogu  oinsá ? Kona ba jogu Pihlweb depende ba komunidade sira atu la bele sosa no  hadook an husi jogus ne’e” tenik administradór ba Jornál Tempo Semanal iha kna'ar fatin foin lalais.
Kestaun ne’e , sai mós preokupasaun ba komunidade Sub-distritu Railako Pedro da Costa Ladún kontente ho jugus ne'ebé mak hahú iha Ermera. Ne’e duni presiza komisaun organizadora  liuliu husi seguransa Tara Bandu tenke tun ba baze taka jogus refere no fó sansaun ba sira ne'ebé fa’an Pihlweb.

Tanba distritu Ermera kria  Tara Bandu la bele iha tan jogu ne'ebé tama iha Distritu Ermera. Karik Komisaun Organizadora iha tempu badak nia laran la taka jogu ne’e sei afeta ba ema barak. Tanba komunidade balu hahú la rai osan no hanoin de'it atu sosa Pihlweb.(**)

No comments: