Friday 19 October 2012

PARTE II: Servidór Estadu TL Sobu Estadu De Direitu


Tempo semanal-Dili, 19/10/2012




Deskonfia MAZY Uza Dolar Taka Servidór Estadu Balun Nia Ibun

KOMPARA ho nasaun sira seluk, Timor -Leste ninia idade sei nurak tebes. Ita presiza tane no asegura didi'ak dignidade rai ida ne'e. Tanba, oras ne'e daudauk ema balun koko hakarak atu sobu estadu de direitu ida ne'e liu husi podér ne'ebé sira iha.

Situasaun hanesan ne'e hahú akontese iha instituisaun estadu nian. Tanba, deskonfia servidór estadu balun ne'ebé serbisu iha Sekretáriu Estadu Polítika Formasaun Profisionál Empregu (SEPFOPE) Departamentu Inspesaun Jerál Trabalhu, Konsulár Nasionál Ministériu Negósiu Estranjeiru (MNE), inklui funsionáriu Servisu Imigrasaun nian balun ne'ebé apoiu sidadaun Filipina iha prosesu sobu estadu de direitu.

La'ós ne'e de'it. sidadaun Filipina na'in rua, Mazy Tayamen no Nathaniel Tayamen ne'ebé mai ho vistu turista, hodi serbisu iha Timor-Leste iha koneksaun mós ho ema boot balu iha Ministériu Turizmu. Tanba, deskonfia ema ne'e mak hala'o hela kombinasaun ho funsionáriu MNE nian ida hodi trata vistu de trabalhu ba sidadaun Filipina ne'ebé tuir loos kontra ona Lei imigrasaun nian.

Servidór estadu sira ne'ebé durante ne'e hala'o ligasaun ilegál ho sidadaun Filipina hodi hamenus osan ba tasa estadu nian hodi buka hatama ba sira nia bolsu mak hanesan, husi parte SEPFOPE, Departamentu Inspesaun Jerál Trabalhu Sra. ida ho inisiál JP no deskonfia envolvimentu funsionáriu na'in 2. Nune'e mós, husi parte Serbisu Polisia Imigrasaun nian Sra. ida ho inisiál E, inklui mós membru PNTL ida ho inisiál P.

Observasaun Jornál Tempo Semanál mós nota katak, sidadaun Filipina ne'ebé daudauk ne'e serbisu iha Kompañia Philweb Lorosa'e Lda nu'udar Country Manager uza osan hodi kompleta rekizitu balu para bele trata vistu servisu ninian ho ninia kaben nian, hanesan buat ne'ebé mosu iha Ospitál Nasionál Guidu Valadares no ba servidór estadu sira seluk.

Tuir informasaun ne'ebé Tempo Semanál rekolla, António Armindo Operasionál Manager Kompañia Philweb husu ajuda ba ninia kolega ida ho inisiál S funsionáriu Ospitál hodi falsifikasaun teze ba Mazy ho Nathaniel hafoin selu ho osan U$$ 140 dolar Amerikanu. Felizmente buat sira ne'e hotu realiza duni. Tanba, husi parte ospitál rasik konsege hasai ona karta Atestadu Médiku ba sidadaun Filipina, maski iha momentu ne'ebá sidadaun Filipina na'in rua ne'e la ba hala'o teze.

Karta atestadu médiku ne'ebé asina husi Dr. Mateus Pereira iha loron 12 Setembru 2012 ho númeru referénsia 7961/HNGV/AM/IX/2012 ba Mazy Tayamen no ba Nathaniel Tayamen ho númeru referénsia 7942/ HNGV/AM/IX/2012.

Bainhira Jornál ne'e tenta husu konfirmasaun ba funsionáriu ospitál ho inisiál S kona ba karta atestadu médiku ne'ebé hasai ba sidadaun Filipina na'in rua. Maibé, funsionáriu ospitál ne'e sujere ba jornalista Tempo Semanál atu ba husu Sr. João funsionariu ida iha ospital. Funsionáriu ho inisial S hateten nia la simu osan ho valór US$ 140 dolar Amerikanu. “Ai la iha..la iha” tenik S hodi responde pergunta jornalista Tempo Semanál liu husi via telefone.

Tanba deskonfia funsionáriu ne'e komesa nega ona buat balu, entaun jornalista Tempo Semanál tenta klarifika katak, karta atestadu médiku ne'e asina husi Dr Mateus. Maibé, ho lian neineik funsionáriu ospitál responde, ooh.. nega sim..sim buat ne’e ami tes hotu.
“Rejistu ne’e selu ketak no hasai raan ketak. Buat sira ne’e iha hotu ona ne'ebá maun ba direta iha ne'ebá mak hare de'it. Ema lokál la selu. Maibé, ida ne'e tanba ema estranjeiru.” dehan S hodi taka nia liafuan.

Hataan ba kestaun ne'e, Dr. Mateus Pereira hateten, kuandu iha rezultadu teze buat hotu ne'e negativu, nia parte hein asina de'it. “sira trasa surat atestadu médiku ba iha ha'u nia fatin hodi ha'u asina. Maibé, ha'u nunka hasoru pasiente sira. Klaru katak buat hotu bazeia ba kritériu. Ne’e duni, se buat hotu di'ak, konserteza ha'u hein asina de'it” esplika Dr. Mateus ba Tempo Semanál iha via telefone.

Maski nune'e, Doutór ne'e hateten iha posibilidade ema balun bele falsifika . Tanba, dokumentu sira ne'ebé tama iha Doutór ninia meza kuaze to'o lima nulu, atus ida no atus rua. Ne'e duni, difisil atu deteta ida-ida.

Dokumentus sira ne'e, la'ós de'it ema estranjeiru nian. Maibé, inklui mós sidadaun lokál nian balu no ha'u hein asina de'it. “ha'u la hare pasiente no ha'u labele cek atestadu médiku ida-ida. 'terkecualia' ba sira ne'ebé mak atu ba rai li'ur hanesan, Amerikanu no rai seluk. Buat sira ne'e mak ita presiza hare bainhira sira dirije mai katak tenke cek ema ne'e, entaun ha'u foin bele hare, ema ne'e loos duni ka lae”, ema ne'e keta iha moras karik. Maibé, atestadu medika ba vistu sira hatama de'it hodi ha'u asina.” tenik Doutór ne'e.

Husu kona ba prosesu administrasaun, Doutór ne'e hateten, klaru katak ba ema lokál la selu no free. Maibé, ba ema estranjeiru parese selu mais Doutór Mateus rasik ladún hatene kada ema selu hira.
Antes ne'e, iha loron 25/9/2012 jornalista Tempo Semanál hakat ba Timor Plaza fatin ne'ebé sidadaun estranjeiru Filipina serbisu ba. Iha momentu ne'e jornalista Tempo Semanál tenta inter vista sidadaun Filipina ne'ebé mai ho vistu turista hodi serbisu iha Timor. Maibé, sidadaun Filipina ne'e lakohi fó informasaun klaru no hanesan subar hela segredu balun. “ami rona informasaun katak ema balun mak hato'o keixa ba parte imigrasaun. Ne'e duni, ami mós hirus. Tanba, ema ne'e serbisu iha ne'e.” dehan Mazy Tayamen Country Manager iha kompañia Philweb.
Iha momentu ne'ebá Mazy ho ninia intérprete António Armindo haktuir mós ba jornalista Tempo Semanál katak, prosesu hotu sira iha Konsulár Nasionál MNE mak hatene, ne'e duni ita boot sira bele ba buka hatene de'it iha ne'ebá. Sira mós akuza katak husi parte Konsulár MNE mak atraza sira nia vistu trabalhu.

“depois ami fó hatene katuas Xanana nia alin lai. Tanba, sira mak iha ne’e. Nune'e mós, imi bele ba husu Sr. Cris iha MNE.” haktuir Mazy ho António Armindo.

Responde kona ba informasaun ne'ebé deskonfia envolvimentu ema boot balu husi Ministériu Turizmu ne'ebé fó apoiu ba sidadaun Filipina, Diretór Divizaun de Jogus iha Ministériu Turizmu, Miguel Lobato dehan, nia parte la hatene. Tansá, sidadaun estranjeiru ne'e mai ho vistu turista. Maibé serbisu fali iha Timor.

“ha'u la hatene no ida ne'e kompeténsia imigrasaun nian. Tanba, Lei la fó dalan ba ami atu hare ema nia dokumentus. Lei so fó dalan de'it ba ami atu peskiza kontabilidade ba lala'ok jogu lotaria legais nian no ida ne'e hatuur iha dekretu Lei númeru 10 tinan 2009.” dehan Lobato hodi rejeita akuzasaun ne'ebé hateten ninia envolvimentu hodi fó apoiu ba sidadaun Filipina ne'ebé loke jogu philweb.
Lobato haktuir, parte imigrasaun mak iha kompeténsia atu hare kona ba dokumentus. Ne'e duni, sira mak bele hatene katak, ema ne'e viola Lei imigrasaun ou lae. “ha'u hasoru malu ho ema sira ne'e loron tolu liu ba. Tanba, ha'u koñese sira no ami hala'o ligasaun ho sira. Maibé, ha'u nunka la'o hamutuk ho sira ba iha MNE parte Konsulár nian.” Lobato ko'alia ho fiar an.

Lobato haktuir tan katak, ninia knaar atu hala'o serbisu ida ne'e no Lei la bandu nia atu hasoru ema sira ne'e. Maibé, la'ós atu trata sira nia dokumentus.

Maski sidadaun Filipina na'in rua ne'e, sidauk hetan vistu trabalhu. Maibé, sira hahú hala'o ona serbisu iha fulan Juñu liu ba. Ne'e duni, sira viola ona Lei trabalhu. Tanba, molok sidadaun estranjeiru ida atu serbisu iha Timor, nia tenke trata vistu trabalhu iha Konsulár MNE, depois hetan rekomendasaun husi Inspesaun Jerál Trabalhu hafoin bele serbisu iha Timor Leste.
Ironia liu tan, iha loron ida antes Diretór Nasionál Konsulár MNE fó intervista ba jornál Tempo Semanál katak, Sra ne’e viola ona Lei. Ne'e duni, presiza kaer no haruka fila. Maibé, depois de intervista ho jornál Tempo Semanál besik tuku 11: 00 otl dader Diretór ne’e fila, dokumentus sidadaun Filipina nian latan ona iha ninia meza leten.

Ho buat hirak ne'e hotu, deskonfia katak ema balu iha Konsulár MNE nian envolve iha prosesu sobu estadu de direitu nasaun ne’e hodi simu pedidu husi kotuk atu ajuda vistu de trabalhu ba Sra. Mazy tanba iha ligasaun ho ema balun ne'ebé servisu iha Philweb. Antes dokumentus husi sidadaun Filipina nian to'o iha MNE, funsionáriu ida iha Philweb ho funsionáriu ida iha Ministériu Turizmu kontaktu uluk ona Diretór Nasionál Konsulár Crisogno de Araújo ninia staff ida hodi kombina.



Iha karta kontratu ne'e, Sra. Mazy Tayamen sai hanesan Country Manager no kada fulan hetan saláriu US$ 2.000 (dolar rihun rua). Nune'e mós, ninia kaben Nathaniel Tayamen sai hanesan IT Support Profesional no kada fulan hetan saláriu US$ 450 (dolar atus hat lima nulu). períodu kontratu ne'e hahú Juñu 2012 to'o Juñu 2013. (**)

No comments: