Sunday 28 October 2012

ALEMANHA APOIU SEPFOPE KAPASITA JOVEN IHA ÁREA MARINERU


Tempo Semanal - Dili, 28/10/2012
Ita Boot Sira Tenke Uza Oportunidade Ida Ne’e Ho Di’ak No Tenke Toma Responsabilidade.
SENTRU Formasaun Tibar liu husi apoiu Sekretáriu Estadu Polítika Formasaun Professional Empregu (SEFOPE) hahú fó kapasitasaun ba juventude Timor-Leste iha área Mariñeiru.
SEPFOPE, Ilidioda costa  Ximenes
Daudauk ne’e, juventude hamutuk na’in sanulu resin lima (15), inklui feto na'in ida tuir hela kapasitasaun iha sentru formasaun Tibar kona ba Mariñeiru nian.

Serimoniál abertura ba formasaun ne’e, partisipa husi Vice Primeiru Ministru, Fernando Lasama de Araújo, Sekretáriu Estadu Apoiu Setór Privadu, Veneranda Lemos, Sekretáriu Estadu Peska, Euzébio da Costa, Sekretáriu Estadu Polítika Formasaun Professional Empregu, Elidio da Costa Ximenes, Reprezentante Governu Alemaña, Presidente Konfederasaun Sindikatu Timor Leste, José da Conceição no Komandante Polisia Maritima, Lino Saldanha. 
   
Iha oportunidade SEPFOPE, Elidio da Costa Ximenes hateten, futuru hahú ohin.  Ne’e duni, husu ba partisipante sira tenke tuir formasaun ho dixiplina.
“aproveita oportunidade ne’e ho di’ak no tenke tau responsabilidade. Atu nune’e bele loke dalan ba maluk sira ne’ebé hakarak tuir ita boot sira nia dalan. Tanba, formasaun ba área ne’e sei hetan ajuda husi Governu Alemaña.” esklarese Elidio.  

Elidio mós hateten, daudauk ne’e traballadór Timor oan sira ne’ebé hala’o servisu iha Koreia hamutuk 1074. Tuir informasaun na’in sanulu (10) kaer roo boot hanesan mós Nakroma. “se kuandu sira fila mai bele reforsa sentru Tibar. Tanba, sira  iha abilidade, skill ou matenek ne’ebé hetan iha Koreia hodi bele koopera di’ak ho sentru ida ne’e.”  

Iha fatin hanesan Vice Primeiru Ministru Fernando Lasama de Araújo hateten, Timor-Leste nia riku soin barak liu mak iha tasi laran. Tanba ne’e, agora daudauk hakarak hala’o dezenvolvimentu iha Distritu Kovalima, Manufahi no Vikeke Timor oan sira mos bele uza tranposta sasan liu husi tasi.

Durante ne’e ema lori sasan tula iha karreta mak ba Suai. Maibé, se bainhira ita iha ona roo, entaun bele mós liu husi tasi. “ha’u hanoin ita presiza mós feri atu lori produtu lokál husi Distritu mai kapitál Dili.” esklarese eis Presidente Parlamentu ne’e.

Lasama mós husu ba partisipante sira atu treinu ho didi'ak. Tanba, tinan 4-5 mai bele sai formadores hodi hanorin fali ema seluk. Serbisu maritima presiza responsabilidade. Tanba, atu hala’o protesaun hodi fó seguransa ba riku soin tasi ninian.

Molok taka ninia liafuan, Lasama agradese ba Governu Alemaña. Tanba, sira iha planu atu fó tan roo ida ba Governu Timor-Leste hodi dezenvolve ekonomia iha rai laran.

No comments: