PARTE X : 20 AGUSTO LORON FALINTIL SE MAKA FUNDADOR FALINTIL?

Komentarius kona ba Politika maka forma militar ga?

Militar maka forma politika

Caetano Guterres Maulory Autor

1.     Hakerek nain rona ema, maluk balun koalia katak politika maka forma militar, tan ba ne’e maka hakerek nain mos hakarak aproveita hato’o komentarius ruma. Tuir hakerek nain nia hanoin bele los, bele mos kontrariu, tan ba iha mundo ne’e iha mos governo barak maka hari ho ditadura militar. Iha ditadura militar ne’e se maka manda militar la’os politiko sira, i wainhira ho sistema ida ne’e, bele mos sira haruka oho politik nain sira hotu, ne’e akontese ona iha rai barak, maluk sira investigadores sira maka hatene liu. Depois hala’o tiha kontra golpe, força iha militar nia liman, se karik maka momento ne’eba militar sira lakohi entrega poder ba FRETILIN nia liman ne’e kala lider CCF sira labele halu buat ida etc.

2.     Nain ulun CCF sira bele mos dehan kompanhia Aileu iha ami nia liman, ne’e los, maibe hare to’ok soldados kompanhia ida deit labele hasoru kompanhia 6 ne’ebe iha “armas pesadas” kilat boot ho soldados quase rihun ba rihun wainhira forma tan milisia popular sira. Ho referensia sira ne’e hakerek nain husu ba nain ulun sira husi partido hot hotu liu liu partido istoriku FRETILIN para pelemenus fo netik konsiderasaun ruma ba liman kroat sira ne’ebe uluk salva no halo FRETILIN nia naran sai boot i ohin loron sei existe no boot nafatin!. Los ga lae, imi hotu hanoin lisuk to’ok ba.

3.     Iha 11 de Agosto de 1975, wainhira ami komesa halo planu para atu halo kontra golpe, ami la’os koalia deit oin sa dezarma UDT, maibe ami koalia mos kona ba sistema do governo ukun ho sistema saida no se maka sei ukun, hanesan hakerek nain apresenta ona iha leten ne’eba, liu liu iha DSM komandante João Rasik hakarak militar maka ukun deit. I bele sai nune’e duni karik ami aceita i bele fo influensia ba komandante Geral Rogerio Lobato i bele mos komandante Rogerio aceita tan ba DSM ne’e kompanhia ida ne’ebe determinante teb tebes, tan ba nia maka kaer armagem kilat boot no kiik, no kilat musan Paiol sira. Maibe ami la tuir komandante João Branco nia hanoin tamba 99,99% tropas DSM mesak militante FRETILIN deit, tan ba ne’e ami mos hakarak duni atu governo ne’e Fretilin maka kaer iha momento ida ne’eba. Ne’e duni hakerek nain husu ba nain ulun sira para labele lori lia hirak ne’e hodi hanehan malu, ita la manan buat ida maibe ita hirus malu maka ba bei beik, etc. etc.(Hakerek badak deit, resumido).

I.               Konklusaun dauluk “primeira konclusaun”

Ita hotu hamutuk halo to’ok konklusaun ida, baseia ba pontos sira tuir mai ne’e, no kait fali ba pontos sira iha leten ba:

1.     Se Karik eis tropas sira la auto-organiza malu desde 1974 atu forma forças armadas ida atu defende intereses povo Maubere nia ne’ebe koalia sai ona husi pontos No. 1 to’o pontos No. 13 iha leten, saida maka sei akontece iha momento ida ne’eba? Akontece katak UDT no mala’e mutin sira  maka sei ukun  duni, i naran Falintil mos la iha hanesan ohin loron, i FRETILIN mos kala la existe tan ona karik?.

2.     Se Karik Sr. Rogerio Lobato, la fo orientaçõeins hato halo koordenaçõeins ho kompanhia hot hotu, komesa buka dalam atu prepara kilat sira iha DSM hanesan ko’alia ona iha pontos No. 16 iha leten, saida maka sei akontece iha momento ida ne’eba?. Akontece katak UDT no malae mutin sira  maka sei ukun  duni i naran Falintil mos la iha too ohin loron, i FRETILIN mos kala la existe tan ona karik?.

3.     Se Karik, Hakerek nain la hasoru ho Kay Rala Xanana Gusmao, no la hetan orientasaun hanesan ko’alia iha ponto No. 17 iha leten ba, para atu forma forsas armadas da libertasaun ida, atu halo kontra golpe ida urgente, maibe tenke fo instrusaun didiak para forsas sira labele viola direitus umanus, labele tiru no oho arbiru deit etc. saida maka sei akontese iha momento ida ne’eba? Akontece katak UDT no malae mutin sira  maka sei ukun  duni i naran Falintil mos la iha  ohin loron, i FRETILIN mos kala la existe tan ona karik?.

4.     Se Karik Sergento Januário Ximenes ne’ebe tenta atu tama iha Companhia DSM ho soldados ho kilat kareta Moniz de Maia 10 resin, ami husik deit, i sira konsege domina kompanha DSM, ne’ebe koalia iha pontus No. 18, saida maka sei akontece iha momento ida ne’eba?.  Akontece katak UDT no malae mutin sira  maka sei ukun  duni, i naran Falintil mos la iha ohin loron, i FRETILIN mos kala la existe tan ona  karik?.

5.     Se Karik malae mutin sira konsegue konvence eis tropas iha Dili laran  iha momento reuniaun entre governo Português, UDT no Forças Armadas Português, ne’ebe koalia ona iha ponto No. 19, saida maka sei akontece iha momento ida ne’eba?. Akontece katak UDT no malae mutin sira  maka sei ukun  duni, i naran Falintil mos la iha  ohin loron, i FRETILIN mos kala la existe tan ona karik ?.

6.     Se karik eis tropas sira tur nonok deit tan ba tauk, hodi aceita deit pontos sira ne’ebe governador Lemos Pires apresenta, ne’ebe koalia ona iha ponto No. 19, ne’ebe malae sira hakarak 1. Extinçãun da FRETILIN, 2. Apartidarismo das Forças Armadas, 3. Aderência das Forças Armadas ao Espírito do Movimentos Anti komunista husi UDT, ne’e saida maka sei akontece iha momento ida neba?. Akontece katak UDT no malae mutin sira  maka sei ukun  duni, i naran Falintil mos la iha ohin loron, i FRETILIN mos kala la existe tan ona karik?.

II.              Konklusaun ikus liu se maka fundador FALINTIL

1.     Tuir atan hakerek nain nia hanoin katak, FALINTIL, Forças Armadas da Libertação Nacional de Timor-Leste,  mai husi transformasaun naran ne’ebe Primeiro komandante Rogerio Lobato ho pioneiros Falintil sira fo nanis kedas, nebe ami bolu “Forças Armadas da Desfesa do Povo Maubere”. Naran ne’e iha tiha ona molok ita tama iha 1975, ne’e duni Sr. Rogerio Lobato hau hanoin nia merece, iha direito atu bolu fundador das FALINTIL.

2.     Tuir mai Kay Rala Xanana Gusmão mos fo orientasaun barak oin sa atu forma Forças Armadas da Libertação nacional ida urgente atu dezarma UDT wainhira hakerek nain hasoru Xanana iha sede Comite Central Fretilin nia, iha avo Xavier nia uma hanesan koalia ona iha ponto No.17, Xanana fo mos konselhos no orientasaun barak sobre sistema democratico, oin sa ita bele hetan relaçõeins diak ho ita nia nasaun vizinho sira i contribui ba paz i estabilidade regional no internacional tan ba konselhos no orientasaun ne’e maka fo dalan naroman tan ba  hakerek nain hodi la aceita ideia komandante João Branco nian atu hari governo militarista depois do kontra golpe. Iha momento ne’eba hakerek nain konsidera Xanana hanesan konselheiro do kontra golpe, tan ba ho razaun sira iha ponto No. 17, maka Kay Rala Xanana Gusmao mos merece i iha direito atu fo naran Fundador das FALINTIL.

3.     Membros do Comite Central da Fretilin mos iha ona ideias atu forma Forças Armadas da Libertação Nacional ida, iha sorumutu ne’ebe halao iha Sr. Alarico Fernandes nia uma, ho prezensa Dr. Mari Alkatiri, Alarico Fernandes, saudoso Carapina alias Lelo ho saudoso Nicolao Lobato, depois ikus mai, iha 20 de Agosto, saudoso Nicolau Lobato ho Dr. Mari Alkatiri muda fali naran ida “Forças Armadas da Desfesa do Povo Maubere” ne’e ba naran FALINTIL, ne’e duni tuir hakerek nain nia hanoin, Dr. Mari Alkatiri ho Alarico Fernandes, saudoso Nicolao no saudoso Carapina, mos mrece i iha direito atu bolu Fundador das FALINTIL.

4.     Ba hakerek nain nia maluk asswain koordenadores ne’ebe leitores timor oan sira tomak hatene ona kona ba sira nia servisu, sira nia espirito de determinasaun ba libertasaun povo rai Timor Loro Sae nia, ami hotu mesak ema kiik nanis, ne’e duni, fo naran saida deit mos sira sei simu, la fo naran ruma mos, ba sira laiha buat ida, importante liu liu maka ita nia rain liberta tiha ona, husik naran ida ne’e hela ba nain ulun sira tamba nai ulun sira maka representa povo ida, iha nasaun ne’ebe deit. Iha mundo rai klaran iha funu ida nia laran to’o hetan ona vitória sempre ida ne’ebe boot liu maka hetan onra louvor no Gloria, simu medalhas oi oin, iha nebe deit nunka bele fo ba ema hotu. Ne’e duni ami ne’ebe pioneiros das FALINTIL la husu buat ida ba ami nia an rasik, maibe ami husu deit ba nai ulun sira ne’ebe halo desisaun, atu naran fo netik medalha de rekoinesimento ida ba Fundadores FALINTIL nia nain 3 nebe refere iha leten, ne’ebe medalha ne’e labele hanesan ho medalha selu seluk, tan ba servisu ne’e la hanesan, nia todan no nia valor mos la hanesan, iha nasaun seluk mos pasti iha, laos osan maka ami husu, tan ba osan ita bele manan ho ita nia servisu no kosar wen, medalha ne’e onra ida, orgulho ida ba ema  ida ne’ebe hari duni fundasaun nasaun ida nian, to’o oras nasaun manan no sai hamriik duni!.

5.     Ba maluk pioneiros FALINTIL selu seluk ne’ebe maka kiikoan nanais kedas ami hotu hatene katak loron ida, pasti Nai Maromak sei Selu iha Lalehan, maibe tan ba nu’udar ita ema ita nia fiar ou ita nia esperansa sei kuran, katak nai Maromak sei selu buat diak hotu ne’ebe ita halo iha mundo, maka dala barak wainhira ami hare ba tratamentu ne’ebe kompanheiro seluk hetan, entaun obriga atu ami kompara fali ami nia servisu sira ne’ebe ami halo atu hamosu FALINTIL, ami halo iha base de apoio, ami halo iha organizasaun klandestina atu sai hanesan ponte boot ida ba sucesso no naran boot frente armada no frente diplomatico nian. Entaun buat  hirak ne’e obriga ami atu kait ba kait mai no halo komparasaun, tetu ba tetu mai afinal servisu sira ita halo iha libertasaun nasaun nia todan, tebes la hanesan duni. Balun todan liu balun todan menos iha ita nia servisu hot hotu. Ita nia susar no terus hot hotu iha tinan 24 nia laran, ita atu lakohi sura maibe dala barak  tratamento disigual ne’ebe ita hetan, ne’e obriga fali ita atu sura ita nia kolen no dala barak ita tanis deit iha ita nia laran katak iha mundo ne’e kala tenke nune’e duni, maibe loron ida pasti maromak sei la haluha I sei selu iha lalehan.