Thursday 25 October 2012

Tempo Semanal Breaking News: Mosu Masakre iha Atabae

Tempo Semanal - Atabae 25/10/2012

Iha oras kalan mais ou menus tuku hitu OTL (25/10/2012) populasaun Atabae hakfodak ho masakre ida iha cidade distritu ninian ne'e. Akontecimentu refere resulta ema nain hat mak mate iha fatin no nain hitu seluk hetan kanek todan ne'ebe daudaun ne'e sei halo hela tratamentu iha centru saude Atabae ninian.

Ema ne'ebe mate ne'e feto nain tolu inklui labarik feto rua no mane ida iha parte leste aldeia ai lok laran antes tama ba cidade sub distritu ninian.

Tuir ofisial PNTL ida ne'ebe konsege jornal ne'e dada lia ho dehan daudaun ne'e membru PNTL sub distritu hetan tan apoiu husi membru PBU ho Polisia maritima halo hela operasaun hodi buka tuir karik sei iha kanekj balun ne'ebe subar iha nakukun.

"Unidade patroliamentu pelotaun ida maka agora daudaun iha ona ne'eba no unidade policia Maritima ida ne'ebe besik hela iha Atabae nian mak aijuda policia eskuadra Atabae ninian hodi buka tuir hela keta halo kanek balun subar hela," informa ofisial PNTL nian ida ba TS.

"Problema ne'e akontese iha tuku hitu maibe Policia sira iha ne'eba mos la hatene tan ba ema ne'e mai ho ninja deit mak liu husi kotuk mai asaltu no tah de'it komunidade iha uma laran. Sira tah de'it, tah de'it be ema mate liu iha uma laran ne'ebe ema lada'uk hatene se maka autor ne'e," dehan ofisial policia ida ne'ebe sei preokupa hela halo servisu ba asuntus atabae ne'e.

Nia konfirma liu tan katak, "mate nain hat ki'ik oan rua no bo'ot rua i feto tolu no mane ida. Kanek sira no mate sira ne'e iha hela ospital no iha fatin akontesimentu policia sira ho komunidade sira sei buka tuir hela karik kanek balun sei subar hela iha nakukun laran."

Daudaun ne'e policia sira sei halo hodi buka hatene motivu kazu refere maibe tuir cidadaun iha fatin refere dehan ba Tempo Semanal katak ema ne'ebe mai halo ataka ne'e ho oin taka metin no liu husi tasi ibun.

"Sira nain hitu ne'ebe sei kanek hela iha ospital ne'eba ne'e mos todan no atu moris ne'e sorte de'it tan ba kanek todan hotu," dehan cidadaun ida ne'ebe mos iha besik hela fatin tratamentu ba kanek sira ne'e.

No comments: