Wednesday 31 October 2012

UNMIT HAHI KAPACIDADE PNTL MAIBE MEMBRU PNTL REKUINESE MALAE HUSIk HELA KONFUZAUN

TEMPO SEMANAL - DILI, 31/10/2012


UNMIT dehan PNTL preparadu ona atu simu responsabilidade husi UNPOL maske iha realidade balun Preparasaun soke. "Ha'u kontente atu hala'o ami nia kna'ar no hetan apoiu husi UNMIT maske dala barak malae sira mai ho sira nia kultura rasik ne'ebe hanorin ami ulun ain de'it," dehan oficiais ida PNTL ne'ebe hola parte mos iha ceremonia tranferencia de responsabilidade ohin (31/10) iha palacio do Givewrnu nia oin ne'ebe husu atu labele hatun ninia naran.

"Nia haktuir, "iha kazu konkreta balun ne'ebe mala'e sira mai ho sira nia ekipamentus kompletu ba servisu ho PNTL iha distritu ida ne'ebe dala barak hala'o sira nia kna'ar la ho meus hanesan komunikasaun, transporte no item sira seluk."

"Mala'e sira barak husi nasaun oioin maka mai foo treinamentu ba ami ne'ebe dala barak halo ami konfuzaun," nia relata.

Oficiais ne'e husu atu Governu ho Estadu bele aijuda halia liu tan kondisaun ba membru PNTL sira hodi bele hasa'e liu tan sira nia moral atu serve nasaun no povu Timor Leste.

"Hanesan Timor oan no hatais farda nasaun ninian ami iha responsabilidade hodi garantia profesionalizmu ho responsabilidade maximu maibe ami mos husu atu komando, Governu ho estadu wainhira hasai ordem ida de'it labele foo tiha ordem ajentes sira maka vitima fali. Husu mos atu hadia kondisaun moris ba membru PNTL sira no reforca lei sira," Oficiais ne'ebe servisu tihan sanolu ona iha PNTL nee.

Foin lalais ne'e iha parlamentu nasional representante povu sira foti ho lian maka'as kona ba participasaun membru PNTL balun iha jogus ilegais, backing emprezarius sira no mos atividade kontra leis sira seluk.

Iha nota de imprensa ne'ebe foo sai husi UNMIT hateten katak,"Dezde PNTL foti filafali responsabilidade ba polisiamentu iha Marsu 2011 seguransa estavel nafatin, ho taxa kriminalidade la aas. Iha 2012, PNTL konsege fornese seguransa durante eleisaun prezidensiál nia volta rua no mós durante eleisaun parlamentár. 

Ohin loron serimónia ida hala'o iha  Palácio do Governo iha Dili hodi marka sertifikasaun ba PNTL. 

Tuir nota de imprensa ne'e katak PNTL prenxe ona kritériu tolu ne'ebé Governu no UNMIT aseita hamutuk. Hanesan tuirmai:-  PNTL hetan ona progresu signifikativu iha área lima prinsipál: lejizlasaun, formasaun, administrasaun, dixiplina no operasaun, hanesan determina iha PNTL no UNPOL nia Planu Konjuntu ba Dezenvolvimentu. 
Oinsá PNTL kontinua ezerse ninia responsabilidade ba operasaun polísia ho resposta adekuada ba kualkér insidente relasiona ho orden públika. 
Hetan ona progresu hodi tau matan ba kualkér lakuna no frakeza ne'ebé identifika ona iha avaliasaun konjunta ba polisiamentu iha kada Distritu no Unidade. 

Númeru pesoál UNPOL sei hamenus maka'as iha fulan Novembru, no Polísia UNMIT hotu-hotu sei sai husi Timor-Leste molok Dezembru nia rohan. 

“PNTL hetan ona progresu signifikativu iha área kapasitasaun," Primeiru Ministru Kay Rala Xanana Gusmão hateten. “Dezde PNTL foti filafali responsabilidade ba polisiamentu iha Marsu 2011, taxa kriminalidade la sa’e no lei no ordein durante ne’e mantein hela daudaun. Ohin loron, ha’u laran-ksolok atu fó-sai katak PNTL foti responsabilidade tomak hodi mantein lei no orden iha Timor-Leste. Ha’u hato’o obrigadu ba Nasoins Unidas no komunidade internasionál ba sira-nia asisténsia hodi hametin kapasidade polisiamentu iha ami-nia nasaun.” 

“PNTL no UNPOL serbisu hamutuk durante liu tinan neen hodi dezenvolve PNTL nia kapasidade atu mantein lei no orden iha Timor-Leste,” Finn Reske-Nielsen, Reprezentante Espesiál Interinu Sekretáriu-Jerál nian no Xefe Misaun ONU iha Timor-Leste hateten.   

“PNTL foti ona pasu boot ba oin durante tempu ne'e no hatudu dezempeñu di'ak dezde foti responsabilidade prinsipál ba polisiamentu. PNTL hetan ona progresu signifikativu iha área hadi’ak dixiplina, formasaun, lejizlasaun, administrasaun no operasaun, hanesan determina iha PNTL no UNPOL nia Planu Konjuntu ba Dezenvolvimentu.” 

“Timor-Leste nia progresu hodi estabelese pás no estabilidade no mós atu hametin instituisaun prinsipál sira, inklui Polísia Nasionál, signifika katak Timor-Leste prontu atu simu UNMIT nia retirada."

“Maibé, atu dezenvolve servisu polísia ida ne’ebé profisionál nu’udar kompromisu tempu naruk, no importante ba PNTL hodi aumenta tan progresu boot ne’ebé hetan tiha ona. Ami enkoraja Governu no PNTL atu kontinua serbisu metin ho parseiru bilaterál sira hodi kontinua sai motór ba progresu depoizde UNMIT sai husi Timor-Leste.” 

No comments: