Sunday 26 December 2010

Arte Marsiais Hamosu Desturbiu, Horta Husu F-FDTL Monta postu Iha Ermera

Tempo Semanal-Ermera, 24.12.2010
Prezidenti da republika DR. Jose Ramos Horta husu Falintil-Forcas de Defeza Timor Leste (F-FDTL) atu monta postu permanente ida, iha Ermera hodi kombate mafia ho kriminozu sira.


Jackie Chan demonstra arte iha stadium Dili
(27/06/08) ne'ebe konvida grupu arte marsiais hotu
iha nasaun ne'e ba hola fatin. (File TS).
Deklarasaun ne’e prezidenti da Republika hasai hafoin konfrontasaun grupu arte marsiais iha distritu refere mak rezuta ema mate no kanek. “Esatdu labele tolera kualker atetude grupu ne’ebe provoka violensia no krime iha komunidade nia laran,” dehan Ramos Horta.

Grupu arte marsiais sira sempre baku malu iha nasaun ne'e dezde nasaun ne'e ukun rasik ninia an.


Tuir informasaun husi autoridade seguransa ninian ne’ebe jornal ne’e asesu dekreta katak grupu ida husi Kolimau maka baku malu ho grupu Korka iha fatin ne’ebe. Estadu halo ona esforsu hodi regula grupu arte marsiais sira ninia atividade no iha fulan ruma kotuk Prezidenti da Republika rasik ba partisipa iha Dialogu ida ho arte marsiais sira iha Ermera.

Xefe de Estadu akresenta katak konfrontasaun grupu arte marsiais sira iha Ermera hanesan, “krime organizadus.” Nune’e duni komandante supremu F-FDTL ne’e sei hato’o pedidu ba komandante F-FDTL, Major Jeneral Taur Matan ruak, atu koloka elementus F-FDTL iha distritu ne’ebe produz Kafe barak liu iha nasaun ne’e, hodi koopera ho membru PNTL para neutraliza situasaun.
Loriadu Nobel da pas ne’e iha loron 10/12/2010 apelu ba joventude sira atu husik tiha violensia. “Hau husu ba imi iha tinan ne'ebé atu mai, imi halo reflesaun, atu soe tiha buat aat ne’e,” dehan Horta.

Nia hatutan, “Ita husu mós ba joven sira, artimarsiais sira ne'ebé, sei oho malu nafatin. Imi oho malu tan ba sá? imi halo kanek malu, taa malu manan saida? Envez hare estuda, buka servisu ruma. Ha'u hatene, susar atu hetan servisu maibé ba estuda la'ós tanba ita servisu. Servisu tanba osan la iha. Maibé hetan osan para sosa tua, droga i depois oho malu.”

Antes de deklrasaun Xefe do Estadu ne’e, iha sorumutuk Ministeiru de Defeza no Seguransa iha sentru konvensaun Merkadu Lama, komandante Jeral PNTL DR. Longuinhos Monteiro iha ninia diskursu sita kona ba kazu refere PNTL husi Unidade Polisia Special halo ona intervensaun.

“Iha kazu Letefoho PNTL atua ona no kaptura ema nain hitu. Halo tiha investigasaun nain rua agora submete hela ba prosesu judiciaru,” dehan Komisariu PNTL, DR. Longuinhos Monteiro.

Nia hatutan katak baku iha loron 16 fulan Dezembru ne’e rezulta, “ema rua mate no halo populasaun husik hela sira nia hela fatin.”

Kazu ne'ebe akontese iha dadersan, mais ou menus tuku hitu, iha suku katraik karaik, fahi luhan ne'e autoridade konsege kaer ona suspeitu hamutuk na'in sanolu no deskonfia membru Korka na'in ida mate, ida kanek todan, na'in rua kanek kaman no uma balun hetan sunu.
Kazu baku malu grupu arte Marsiais iha Distritu ne’e akontese beibeik ona no rezulta ema lakon moris no kanek.

“Grupu kolimau agora fahe ona ba tolu, ida kolimau 2000, Kolimau bua Malus no Kolimau Uma ahi, Iha atuasaun ne'e PNTL sira tiru kanek membru Kolimau ida tan ba ameasa PNTL sira,” esplika DR. Longuinhos.

Eis Prokurador Jeral do Estadu ne'e  hatutan katak dezde fulan Agusto too Dezembru iha mosu krime total 3156 prosesu.

Komandante jeral ne’e informa ba partisipantes sorumutuk ne’e inklui Primeiru Ministru Kay Rala Xanana Gusmao ne’ebe ka’er mos pasta hanesan Ministru da Defeza no Seguransa, Sekretariu do Estadu de Defeza, DR. Julio Tomas pinto, Sekretariu do Estadu de Seguransa, DR. Francisco Guterres no Maijor Jeneral Taur Matan hodi dehan, presiza esforsu atu kombate krime organizadu iha nasaun ne’e. (TS)

No comments: