Manu Liras Besi Batavia Hahu Semo Bali Dili Ba Mai ho Hanehan Folin Kontra Merpati

Tempo Semanal-Dili, 27.12.2010

Photo Doc Batavia air

Iha dader ida ne’e inaugura tan manu liras besi ida hodi semo entre bali ho dili. Tuir Lourenco Oliviera boot husi kompania Timor oan ne’ebe konsege hatama aviaun ne’e konfirma katak iha tuku sanolu ho balun ohin aviaun Batavia sei tun iha aeroportu komo Dili tan ba hetaan apoiu diak husi Ministeiru Turismo ho komersiu no maske lori tempu Ministeiru Obras Publiku konsege ona hasai licence ba sira.
Loureco esplika objetivu husi hatama tan aviaun seluk mai iha Dili tan ba presu ne’ebe karun nune’e sai obstakulu ba komunidade kiik sira labele sa’e aviaun ba Bali maske iha realidade sira nia oan barak maka eslkola iha Indonesia.

“Hau hanoin atu hatama Batavia mai la’os atu de’it razaun atu buka osan kerdizer ke ita labele halai husi ne’e, i tambein razaun ida ke ha’u atu hateten durante dez anus ona la iha kompetisaun. Depois ita kompara ho fatin selu-seluk iha asean nian, ita hetaan tiket ba mai baratu faan baratu.”

Louranco ninia intensaun hakarak hanehan folin no fornese kondisaun aviuan ida kee diak liu aviaun ne’e iha ona.

“Tan ba ida ne’e maka ha’u hakarak hatama tan Batavia mai para atu halo kompetisaun iha ne’e ba route Bali. Ko’alia kona ba kompetisaun kerdizer ke folin baratu. Kuandu Folin baratu ema kiik sira ne’ebe ke osan naton de’it mos isra bele sa’e aviaun,” dehan Lourenco.

Nia hatutan, “Liu tan estudante sira ne’ebe maka eskola iha Surabaya, iha Yogja no iha Jakarta sira bele hetaan fasilidade tan ba iha kompetisaun presu tun i depois sira nia aman ho inan sira ne’ebe maka durante ida ne’e sai husi ne’e ba kupang ho oras sanolu resin rua, depois sa’e fali aviaun ba Surabaya ne’eba presu hanesan hela de’it. Tan ba ida ne’e maka hodiseik ami loke ho presu US$232.00 (Duzentus i trinta dois Dollar ), ba mai. Ha’u sente katak osan ida ne’ebe maka sosa bilete iha ne’e ba iha Bali hanesan de’it ho osan ne’ebe maka sira uza iha ne’e ba kupang fila mai.”

Lourenco mos esplika katak hafoin de Prezidenti da Republika DR. Jose Ramos Horta inaugura Bou Batavia ohin tuku 10.30 OTL hahu aban aviaun ne’e sei halo kedan operasaun husi Bali mai Dili. “Semana ida dala hitu. Semo lor-loron. Nia ohin komesa inaugura. Komesa aban nia semo regularmente. Nia sai husi Bali sete oras dader oras Bali ninian no iha Timor tuku walu. Nia tun iha ne’e nove kuarenta. Depoius nia sai fali iha ne’e dez i vinte. Nia too fali iha Bali Onze oras. Aviaun ne’e sei lori pasajeiru 142 no aviaun ne’ebe maka ami uza Air Bus 320 ho Air Bus 319,” esplika Lourenco Oliviera.

Dezde 2002 aviaun Indonesia ida de’it maka opera entre Dili bali ho presu ne’ebe karun tebes no dala barak ona hamosu deskontentamentu ba pasajeiru sira inklui Prezidenti Horta rasik tan ba folin ho kondisaun aviaun ne’ebe uza entre Bali ho Dili. Nune'e Lourenco garantia sira nia kompania sei uza, "aviaun ne'ebe foun, ne'e aviaun Air buss, foun,  la'os boeing sira ne'ebe tuan." (TS).