Wednesday 29 December 2010

Kuba Hahu Dada Timor Sai Husi Analfabetizmu

Tempo Semanal-Dili, 28.12.2010

Kooperasaun entre Timor Leste ho nasaun Kuba iha area hamenus ema ne’ebe la hatene hakerek no lee iha Timor leste foo hakat boot tebes ba oin tan ba tuir statistika tinan kotuk numeru total hamutuk ema 230,819 tun ba ema 87,292 mak seidauk hatene sani ho hakerek.

Maske nune’e durante plenaria ba intensifikasaun kampania alfabetizasaun ho metodu Kubano iha sentru konvensaun eis Merkadu Lama, embaixador Kuba apela xefe suku sira at koopera nafatin ho profesores husi nasaun Fidel Castro ninian ne’e hodi hatutan matenek ba Timor Oan sira ne’ebe seidauk hatene.

“Ha’u husu xefe suku sira atu servisu hamutuk ho profesores kubanu no Timor oan sira seluk atu aijuda hanorin no fahe matenek ba maluk sira ne’ebe sei moris iha nakukun laran,” dehan iha diskursu Embaixador Ramon Hrenandez.

Ho numeru profesores kubanu nain 36 maibe sira halo esforsu maka’as duni atu hamenus numeru analfabetizmu iha nasaun ne’e.

Enklave Oekuse ho sub distritu Atauro deklara ona husi prezidenti Horta hanesan fatin ne’ebe livre husi problema la hatene sani no hakerek no espera distritu sira seluk sei hakat tuir izemplu husi fatin rua ne’e ninian.

“H’u husu mos ba distritu seluk ne’ebe seidauk hetan 100% livre husi alfabetizmu, atu kontinua nafatin programa ne’e ho didiak, atu nune’e atu nune’e populsaun bele hatene lee no hakerek,” dale Prezidenti RDTL, DR. Jose Ramos Horta.

Tuir Observasaun Profesores Kubanu sira ne’e hasoru difikuldades oi-oin maibe sira la hakiduk hodi tulun emar Timor sira sai husi analfabetizasaun.

No comments: