Wednesday 29 December 2010

Forsa Naval USA Foo Ksolok ba Labarik Orfanatus TL iha Natal




Tuir nota de imprensa ne'ebe haruka husi embaixada Amerika informa katak, Iha kalan Natal, “Santa Claus”  vizita fatin orfanatu haat hodi haksolok labarik sira no fo prezente Natal nian hamutuk 100 resin ba labarik sira. 

"Santa Claus ne'e la seluk la let mak membru forsa Naval Estadus Unidus nian, naran Dustin Hicks. Dustin servisu hanesan membru destakamentu bataliaun konstrusaun enjineiru Estadus Unidus nian ho naran “Seabees,” dehan iha komunikadu refere.

Nota ne'e mos hatutan katak, "Vizita ba orfanatu ne'e hanesan vizita ba dala rua nebe mak Seabees organiza ne'ebe sira hanaran “Brinkedus ba Timor” – sira kolekta brinkedus no doasaun husi kolega, familia, no maluk servisu sira durante tinan nian laran no depois lori ba foo labarik Timor sira iha kalan Natal."

Iha celebrasaun natal tinan 2010 ne'e, Seabees vizita orfanatu  Has Laran, Santa Clara, Misionari Jesus no Santa Bahkita Becora. 

“Santa” Dustin” mak fahe prezente ba labarik sira depois membru Seabees sira seluk fornese dosi ba labarik sira. Labarik ida-idak iha oportunidade atu tur iha Santa nia hitin!, depois ne, labarik sira ho hamnasa fo fali kanta Natal nian ba Seabees sira," esplika iha nota de Imprensa ne'ebe jornal ne'e asesu husi embaixada Amerika," esplika iha komunikadu ne'e.

Membru Seabees Jonathan Garigal deskreve vizita ne hanesan “loron nebe majiku teb-tebes”, nia hatutan katak laiha tan buat seluk nebe diak liu do ke selebra kalan Natal hanesan ne'e dok husi familia/uma.


Seabees sira halo vizita ne’e hanesan membru  destakamentu enjeneiru Naval Estadus Unidus nebe haruka mai servisu iha Timor hahu iha fulan Marsu tinan 2009. Sira servisu hamutuk ho forsa militar Timor-Leste no enjeneiru sivil ne’ebe halo estajiu ba projeitu sira hanesan konstrusaun no renovasaun  ne’ebe foka liu ba eskola, klinika, no sentru komudidade iha Timor-Leste laran. (TS)

No comments: