RELATORIU OIOS DUN SED, JULIO TOMAS PINTO NEGA, SE LOOS MAKA BOSOK SE?

Intervista Eskluxivu Tempo Semanal-Dili, 04.12.2010

Seksaun SSR (Security Sector Reform) UNMIT ninian misaun atu halo reforma ba setor seguransa iha nasaun ne’e hafoin krize tinan 2006 hahu falla daudaun maske kustu liu milaun haat Dollar Ametrikanu husi nasaun doador sira nian. Membru PNTL sei uza nafatin kilat no violasaun hasoru populsaun sivil hanesan mosu iha kazu delta nova, Atauro, Xina Rate inklui kazu tuda malu iha Jalan Garuda has laran kamea bekora (01/12). Iha kazu has laran ne’e hetook aat liu tan membru PNTL ida husi CSP (corpu Seguransa Pesoal) uza fali kilat ne’ebe hodi foo seguransa ba membru Governu sira nian tiru ameasa populasaun iha area ne’eba hodi la hatudu neutralidade iha ninia misaun tan ba hamriik iha grupu ida nia sorin kontra grupu joven seluk ida.

Tuir relatoriu OIOS mak segredu tebes jornal ne’e konsege asesu dehan seksaun SSR la iha planeamentu maka diak, servisu la efetivu no la efisiente. Tuir observasaun Tempo Semanal UNMIT tenta atu konvense tan doador sira atu foo nafatin apoiu ba servisu SSR ninian maske too fulan oetobru osan barak maka seidauk konsege exekuta. UNMIT ho UNDP kopia daudaun ona Governu TL ninia pakote referendum hodi fahe projeitu ho durasaun tempu ne’ebe limite ba ONG lubun ruma ho valor to’o US$20,000. Tuir planu sekarik orsamentu ne’e maka labele exekuta hotu ate loron 15 fulan Dezembru 2010 maka UNMIT sei foo hikas fali osan sira ne’e ba doadores sira.

Iha relatoriu refere UNMIT duun todan fali ba governu Timor Leste katak laduun iha interese hodi koopera ho sira nia programa I liu-liu relatoriu ne’e halo tilun mean ba sekretariu Estadu de Defesa.

Relatoriu OIOS dekreta katak sekretariu Estadu de Defesa (SED) Timor Leste ninian asina akordu sekretu ida ho asesor ida ne’ebe selu husi SSR, atu labele informa fali ba UNMIT kona ba ninia aktividade iha Sekretaria Estado de Defesa maibe DR. Julio Tomas Pinto ho lian maka’as nega. Nia mos dehan ONU ninia emar sira ne’ebe haruka mai atu aijuda nia la’os mai tulun halo servisu maibe buka hakerek de’it relatoriu tan ba ida ne’e maka governu duni hikas ona ba UNMIT. Uniku membru Governu ida ne’ebe maka husi fiar relijiaun Muslimanu ne’e dehan UNMIT ladun foo apoiu ba F-FDTL i hetook aat liu tan maka asesor UNMIT tenta atu halo servisu husi kotuk la ho ninia kuinesimentu. Tuir nia katak UNMIT nia emar sira la kompriende servisu military ho Polisia iha nasaun ne’e no husu militar sira atu ba foo treinamentu ba polisia. Tuir mai ita ba akompania hamutuk intervista eskluxivu jornalista Tempo Semana (TS) ho Sekretariu Estadu de Defesa DR. Julio Tomas Pinto (JTP) hodi hatene diak liu tan ninian lian hataan ba UNMIT ninia relatoriu no tulun UNMIT nian ba F-FDTL.

TS: Oinsa kooperasaun Secretario estado Defesa ho UN?

JTP: Bom, UN iha Timor Leste tanba guverno Timor Leste mak komvida sira mai tanba ita Timor oan seidauk foo liman ba malu atu resolve ita nia problema iha 2006. Sira mai atu suporta ita hanesan iha mandato konsello Siguransa ONU nian hatene. Tamba governu mak konvida sira mai portantu ita tenki koopera malu para servisu hotu lao diak. Governu mos hamutuk ho prezidente e parlamento konkorda ona para ita ho ONU bele suporta malu em termos de SSR and Development.

TS: Asesor nain hira mak servisu iha Sekretaria estado defesa e F-FDTL?

JTP: Iha F-FDTL sira la iha asesor iha ne’eba. Sira so iha de’it asesor balun iha hau nia kantor. Uluk sira haruka asesor ida mai mas hau haruka fila tan ba loron-loron mai interview fali hau para halo report ba sira. portantu hau dehan diak liu nia ba fatin seluk de’it, ne’ebe nia fila ba UNMIT maibe agora ami iha ne’e asesor nain 2 husi ONU e ida tan mak apoio tekniko administrasaun. Asesor ONU ida husi Malaysia ne’ebe servisu diak tebes ho ami e mos F-FDTL. Asesor UN ida tan kolega ida ne’ebe husi Australia nia ko’alia tetum diak tebes e agora ajuda hela organiza Instituto Defesa Nacional e ninia papel diak tebes. Sira nain rua nebe agora iha SED hau mak husu para sira fulltime servisu iha SED para fo apoio maksimo ba ita.

TS: Nusa mak UNMIT sira la fo apoio ba F-FDTL..?

JTP: Ita boot sira tenki husu ba UNMIT. Mas ha’u hanoin tan ba tuir sira nia mandato katak sira foo apoio maka’as mak ba PNTL portantu sira la foo apoio total ba F-FDTL. Maibe sira foo deit treinamento loron ida ba F-FDTL liu-liu iha Military Liasson Officer ba posto sira iha Fronteira e treinamento Human Right ba Policia Militar. Iha asunto rua mak hau hakarak ko’alia kona ba ligasaun entre ONU ho F-FDTL. Primeiro, governo Timor Leste agora iha hela komprimisu ida atu dezenvolve Civilian Oversight. Ne’e signifika katak politikamente sivil mak kaer hela pasta politika. Portantu todos ligasaun externa hanesan ONU ho F-FDTL tenki atravez sekretaria estado da Defesa. Maibe ami foin daudauk ne’e, malae UN staff ida mai obriga para halo treinamento ba direitus Humanus ba Policia Militar foun sem fo hatene ba Sekretaria Estado da Defesa. Ne’e hakarak dehan saida? Ne’e katak sira rasik mos la kompriende konseitu baziko civilian oversight ne’ebe iha. Ha’u sei dehan ba sira katak ne’e primeiro e ikus liu ona mak sira halo. Hau mos foo hatene ona ba komando F-FDTL para prevene sasan sira hanesan ne’e. Tan ba ba mai ha’u direitus Humanu ne’e importante maibe la’os ema liur ida mak mai hanorin fali ita, tan ba direitus humanu ne’e buat ida nebe tempel hela ho ita nia istoria luta ba ukun rasik an, kuando nasaun barak toba hela. Depois ita mos husu para sira konkorda katak Militar ne’e tenki treino militar la’os ba treino fali policia hanesan hau rona dehan Military Liasson Officer atu treino fali BPU mezmu sira kancela ona. Segundo, Ita Timor Leste ne’e halo capacity building husi ONU durante 10 anus ona, ne’ebe agora ita tenki prepara ona plano para iha tempo ida asesor sira ONU nian ne’e tenki para ona. Diak liu ita kria de’it kooperasaun bilateral ida ho nasaun sira hanesan Australia, New Zealand, Amerika depois mak sira ajuda ita.

TS: Mas Relatorio ONU dehan ita boot halo fali akordu segredu ida ho sira nia staff iha Defesa para labele fo informasaun ba sira?

JTP: Hahahah ha’u la foo mos sira hafuhu hela. Mas hanesan ne’e. Se la sala ha’u seidauk halo akordo ida para Asesor ONU sira ne’e la foo informasaun ba sira. Maibe ha’u hakarak dehan nu’udar sekretario estado da Defesa ha’u tenki asegura dokumento sira ne’ebe kategoria ba Konfidensial. La’os sira servisu iha Defesa be sira asesu hotu ba todos dokumentos estado ninia. Uluk iha 2009 hau iha duni asesor legal Portugues ida mak ONU sira selu nian para ajuda prepara Lei Defesa e Siguransa Nasional iha Sekretaria Estado da Defesa. Hau dehan ba nia, “o bele halo relatorio ba ONU tan ba hau hatene katak sira sei husu ba o kona ba saida mak o servisu mas o tenki hatene saida mak o foo e saida mak o labele foo. E mensagem ida ne’e hau nia obrigatorio para asegura dokumento sira ne’e hotu”. Lei Defesa Nasional klaru que sira hetan dokumento ida ne’e hanesan mos lei Siguransa Nasional. Portantu durante hau sei iha ne’e, hau sei asegura dokumento estado nian ne’ebe kategoria ba konfidensial para ema liur labele hetan asesu. Ne’e obrigatorio ba ha’u nia nasaun. Mas ha’u hakarak agredese ba ONU liu-liu Sr. Atul Kare e Sra. Amirah Haq ne’ebe durante ne’e hatudu nafatin suporta atividade iha Defesa hodi haruka Asesor mai iha ne’e.

TS: Asesor nia papel saida iha Defesa..?

JTP: Koopera mas nao e entra. Coopera mas labele tama ou mete. Mak ne’e deit simples ga lae hahaha.