Iha Kinta Meudia oras Timor Leste Prezidenti da Republika DR. Jose Ramos Horta iha ninia mensajan ba Nasaun relasiona ho taka tinan rihun rua sanolu, durante minutu haat nolu resin tolu iha palasiu Prezidenti ai Tarak Laran mos, ezije lori lalais kazu desconfia bala husi PNTL nia membro ida hakotu moris Valdir Cesar do Nasimento Lebre aliás Kuka iha Salaun Delta Nova Komoro, loron 29/12/2009. “Nu’udar xefe de estadu, ezije kazu ne’e lalais lori ba tribunal para tribunal halo tesi lia i halo nia desizaun,” dehan Prezidenti da Republika DR. Jose Ramos horta.
Tuir fontes jornal ne’e iha palasiu prezidenti dehan prezidenti mos iha programa loron 29/12/2010 tuku 17.00 OTL ba hola parte iha ceremonia tau ai funan tinan ida ba Kuka ninian iha Santa Cruz Hodiseik hodi hatudu ninia sentimentu solidariedade ba família vitima.
“Familia ida ke nunca halo aat ba ema ida i mate iha tempu liberdade i tempu independência iha polisia nia liman, conforme alegasoens. Ne’e duni ita deve ba família i la’os deve de’it ba família no kazu ne’e la’os kazu politika ida. Kazu ne’e omecidiu,” dehan Loriadu Nobel da Pas ne’e.Iha akontesimentu masakre 12 de Novembru tinan 1991, Kuka ne’ebe sei ki’ik liu mos hola parte iha manifestasaun refere maibe onsege eskapa husi bala TNI sira ninian maibe nia tenke mate fali iha fatin festa ninian i hetook aat liu tan desconfia mate husi bala husi autoridade ne’ebe atu garante lei iha nasaun RDTL.
“Ha’u hanoin kazu ida ne’e, ke hotu-hotu hatene no kuinese sa ida maka akontese tenke konklui lalais para lori ba tribunal i tribunal maka deside. Tan ba joven ida maka mate, triste teb-tebes. Vinte i tal anus, foin maka remata nia kursu. Hakarak hela no servisu iha timor, kontribuisaun maka’as ba sociedade, ba nasaun ida ne’e,” esplika Horta.
Maibe Prezidenti mos haree katak prosesu investigasaun presiza halo didiak atu too iha Tribuanla labele taka de’it kazu.
“Iha tinan ne’ebe liu, hatene ke PNTL, tuir nia prosesu nvestigasaun, investigasaun ke la’o neineik hanesan investigasaun hotu-hotu. La iha polisia ida ka Prokurador geral ida bele halo short cut. Ne’e investigasaun ida ke bele sala. Tan akontese ona dala barak investigasaun la’o la diak, la kompletu ba tribunal, tribunal soe tiha. I depois hotu-hotu hateten tribunal maka iha intervensaun politika,” nia dehan.
Iha parte seluk parte balun desconfia katak PNTL la seriu hodi halo investigasaun ba kazu ne’e hodi dada to’o agora. “Ha’u desconfia katak kazu ne’e iha involvimentu PNTL entaun sira rasik lakohi halo investigasaun ho didiak hodi lori ba submete iha tribunal,” dehan Estudante UNTL ida ne’ebe dehan ninia naran Aquelino Simoes.
Simoes enkauraja PNTL atu ho barani simu sira nia responsabilidade hodi bele manan simpatia husi comunidade. “Ha’u hanoin komando PNTL loloos ne’e dudu kazu sira hanesan Kuka ninian ho Atauro ninian ne’e lalais para povu ne’e bele hateten sira seriu duni atu halakon atetude uza forsa no iha duni lia loos. Tan ba se karik la’os PNTL maka tiru Irmaun Kuka entaun sira tenke kaer ona suspeitu seluk ga,” dehan simoes. (TS).
No comments:
Post a Comment