Friday 17 December 2010

Nasaun 11 Partisipa Jogu Iha Asean University Games TL Hahu Hemu Bee

Tempo Semanal-Bangkok, 16.12.2010
Asean University Games ba dala 15 ne’ebé halao iha Chiangmai Thailand 15-23/12/2010, hetan mos partisipasaun husi ekipa Timor Leste. Modalidade ne’ebé Timor Leste iha mak hanesan Taekwondo, Volly Praia, karate do, atletik no pencak silat. Ekipa ne’e kompostu husi ema nain 29 ne’ebé to’o iha Chiangmai iha loron 14/12 ne’ebé delega husi xefi gabinete atual Sekretaria Estadu Juventude no Desportu Filipus Pereira.

Seremonia abertura halao iha Universidade Maejo Chiangmai 15/12, nasaun ne’ebé partisipa mak hanesan Timor Leste, Indonesia, Thailand, Malaysia, Fhilipina, Myanmar, Laos, Cambodia, Brunei Darussalam, Singapura, Vietnam. Seremonia abertura ne’e loke husi Ministru Edukasaun Thailand Chinaworn Bunyakiart. Iha seremonia ne’e partisipa mos husi ulun boot seluk Thailand nian, seremonia ne’e remata ho dansa kultura Thailand husi estudante universidade iha Chiangmai.

Total modalidade iha eventu ne’e mak hanesan foot ball, golf, taekwondo, volley ball, atletik, badminton, basket, beach volley ball, futsal, sepak takraw, tennis, ten pin bowling, swimmning. Xefi delegasaun Timor Leste Filipus Pereira (Nino) hateten, TL iha deit modalidade 5 tanba kestaun preparasaun no orsamentu.

Iha loron 16/12 hahu ho jogu volley beach entre Timor Leste hasoru Malaysia, atleta volley beach TL Jose da Costa no Feliciano Soares jogu ho spiritu tebes maibe jogu ne’e manan husi ekipa Malaysia ho set 2 ho valor ne’ebé tipis 22:20 iha set primeiru no segundu. Tuir orariu jogu refere sei halao iha loron 17/12 ne’ebé TL hasoru Indonesia 1, 20/12 TL hasoru Thailand 2 no iha loron 21/12 TL hasoru Laos 2.

Alende ne’e modalidade karate halao iha loron 17/12 ba klase 55 kg feto TL hasoru Malaysia, ne’ebé joga husi atleta Elisa Soares Lopes, iha loron 18/12 TL hasoru Laos klase 50 kg feto husi atleta Ana Maria Paula Pinto, TL hasoru Thailand 55 kg mane atleta ho naran Jaime Godinho Soares no jogu komite team feto TL hasoru Vietnam ne’ebé atleta Eliza Soares Lopes, Ana Maria Paula Pinto no Maria Amelia Ramos mak sei joga. (TS)

No comments: