Sunday 11 November 2012

Aniversariu 12 Novembru Sei Celebra Mos Iha Distritu U$ 1300


Tempo semanal - Dili, 11/11/201

Monumentu masakre 12 de novembro 1991
 ne'ebe halo besik Igreija Motael ninia oin
monstra hela jovens Amali aijuda hela ninia belun ida
ne'ebe kanek iha loron ne'eba.
 Monumentu ne'e besik remata ona
maibe servisu nain sira sei hadia hela
 buat balun ne'ebe seidauk
 kompletu (Foto Isolino Vas)
TINAN-tinan povu  Timor-Leste sempre komemora loron 12 Novemru hodi hanoin hikas sakrifisiu no kontribuisaun Juventude Loriku Asu-wain ne’ebé oferese sira nia vida tomak ba ukun rasik an ida ne’e.

Hanesan tinan baibain Governu sempre aloka orsamentu ba atividade komemorasaun loron 12 Novembru nian. Ne’e duni, iha tinan ida ne’e Governu aloka orasmentu ba kada Distritu hamutuk U$1300. Orsamentu ne’e atu uza ba atividade hanesan desportu, seremonia hasae bandeira no atividade sira seluk hodi anima komunidade sira.

Presidente Konsellu Juventude Nasional Timor-Leste (KNJTL), Levogildo Hornay hateten, orsamentu ne`ebé  aloka ba Distritu iha U$ 1300. Maski orsamentu ne’e ho valor ki’ik maibe ida ne’e mak ita nia governu ninia esforsu. Ne’e duni, ita tenke simu hodi bele hala’o atividade simples ida hodi hanoin hikas juventude Loriku Asu-wain sira ne’ebé oferese ona sira nia vida ba rai doben ida ne’e.

Lider juventude Timor – Leste rekoinese katak tinan barak ona joventude iha Distritu, liu-liu iha Suku ladun sinte kona ba Loron 12 Novembru. Maibe, husu ba juventude sira iha aldeia, suku, Sub-Distritu no Distritu tenke unidade nafatin atu hala’o reflesaun ba loron 12 Novembru hodi hanoin hikas maluk juventude sira ne’ebe la hamutuk ona hotu.

“maski orsamentu ne’e ho valor ki’ik mais iha ninia sentidu ne’ebé boot bainhira ita uza hodi hala’o atividade ruma hodi hanoin hikas juventude loriku Asu-wain sira ne’ebe oferese sira nia vida tomak ba rai idane.” dehan Levogildo (**)

No comments: