SAS Menus Kontrolu Komunidade Maina II Hadau Malu Bemos

Tempo Semanal - Lospalos, 09/11/2012

Iha imazen ne’e komunidade
husi Suku Maina II lori balde no jerigen
 hodi antrian iha tanki bee nian
 hodi koru bee troka malu. Foto/Richo.

Bee Nu’udar Nesesidade Baziku Ba Ema Moris. Maibe, Tansá Komunidade Tenke ‘Antiran’ Hafoin Bele Hetan Bemos No Pior Liu Tan Komunidade Balun To’o Ohin Loron Defisil Atu Asesu Ba Bemos.

LORON 29 Outubru 2012 organizasaun Haberan Institute realize seminariu ho topiku Edukasaun Dame Komunitariu iha Suku Maina II, Sub-Distritu Moro, Distritu Lautem. Objetivu husi seminariu ne’e, fó hanoin ba komunidade sira oinsá bele hametin dame no pás entre komunidade hodi atinze prosesu dezenvolvimentu ne’ebé sustentavel.

Koalia kona ba dame, pas no dezenvolvimentu konserteza sei la ses husi povu ninia moris loro-loron nian. Tanba, tuir prespetiva husi matenek na’in balun katak, dezenvolvimentu bele la’o di’ak bainhira povu moris iha situasaun dame, pás no hakmatek nia laran. Nune’e mós, dame no pás bele mosu bainhira nesesidade baziku povu nian rezolvidu ona.

Maibe, oinsá mak ita atu koalia kona ba dame, pas no dezenvolvimentu se bainhira to’o ohin loron komunidade balun seidauk bele asesu ba bemos (air bersih). Situasaun ida ne’e kuaze akontese iha teritoriu Timor-Leste, inklui mós iha kapital Dili. Tanba, realidade hatudu povu barak mak to’o ohin loron sei ajize kona ba bemos, liu-liu komunidade sira ne’ebé hela iha area rurais.

Dala barak reprezentante povu iha uma fukun Parlamentu Nasional sempre kostiona kona ba problema menus bemos. Maibe, rezultadu husi problema ne’e nunka iha finalidade, tanba hahu husi primeiru governu nia ukun to’o kintu governu problema bemos nunka atu resolve no tinan ba tinan povu sira mak halerik nafatin ba bemos.

Osan barak mak Governu gasta ona ba area ida ne’e, liu husi projetu kanalizasaun bemos ba komunidade sira. Tanba, Governu iha hanoin di’ak hakarak fasilita bemos ba ninia komunidade sira tuir uma kain ida-idak. Maibe, Governu nian esforsu seidauk masimu. Tanba, komunidade balun to’o ohin loron tenke tutur sira nia zerigen hodi la’o kilo metru ba kilo metru hafoin bele kuru bemos. Aliende ne’e, iha fatin balun komunidade sira tenke ‘antrian’ no hadau malu bee.

Ho indikasaun ne’e hotu hatudu katak, komitmentu Estadu hodi garantia bemos ba ninia komunidade, seidauk la’o di’ak. ne’e duni, husu ba governu liu-liu Dirasaun Nasional Serbisu Agua no Saneamentu (SAS) atu toma konsiderasaun ba kestaun hirak ne’e.

Daudauk ne’e komunidade Suku Maina II loron-loron tenke lori sira nia masa ba ‘antrian’ iha tanki bee nian durante oras barak nia laran hadi kuru bemos.  “Maski kleur maibe ami tenke pasensia hodi hein, se lae ami atu ba kuru be iha ne’ebé. Dala ruma ami hakilar malu tanba de’it hadau malu atu kuru be. Ne’e duni, husu ba governu tau matan ba problema ne’ebé ami enfrenta” dehan tia Agustina ba Jornal Tempo Semanal iha aldeia Laikara, Suku Maina II.

Tuir nia, be sai hanesan problema boot ba komunidade suku Maina II, ne’e duni husu governu, liu-liu Ministériu ne’ebé kompotente bele responde lalais situasaun ida ne’e. Tanba, be importante ba nesesidade uma laran nian.

Xefe Suku Maina II Faustino Fernandes hateten, Suku Maina II fahe partensia rua, aldeia rua tama iha partensia leten no aldeia rua iha partensia kraik, inklui Lailakara. Iha parte Laikara be araska tebe-tebes, liu-liu tama ona fulan Augostu to’o Dezembru.

Be tanki ne’e ami dada husi leten iha tempu Indonesia nian kedas, no be ne’e ami dada liu husi fatin rua. Maibe, la sufesente ba komunidade sira. Ami mós hato’o ona proposta ba Pala Merah Internasional iha Distritu Lautem para bele koordena ho Governu lokal, oinsa mak bele dada be husi Suku Baduru mai iha ne’e” dehan ulun Boot Suku Maina II.

Nia hateten, be ne’ebe atu dada husi Suku Baduru sei uza eletrisidade. Tanba, tuir planu ne’ebé sei tau tanki boot ida iha area Daulutur hafoin mak dada fali ba iha Baduru. Maibe, buat hotu desizaun Governu nian.

Bazeia ba observasaun jornalista Tempo Semanal iha terenu nota katak, bainhira Organizasaun Haberan Institute hala’o seminariu Edukasaun Dame no komunitariu iha Suku refere hodi koalia kona ba dame, pas no dezenvolvimentu. Maibe, iha momentu ne’e mós komunidade sira haksesut malu tanba hadau malu bee atu kuru.

Ne’e duni, iha seminariu nia laran jovens ida hamrik hodi hato’o pergunta ba orador sira katak, durante ne’e komunidade suku Maina II moris iha situasaun pas no hakmatek. Maibe, ho problema menus beemos bele hamosu konflitu. (**)