KOMUNIDADE-sub-distritu Fatu Berlihu, distritu Manufahi daudauk ne’e, moris lahakmatek. Tanba, prezensa grupu CPD-RDTL komesa tama to iha sub-distritu Alas hodi okupa rai tos. Ho prezensa CPD-RDTL Adjuntu Administrador distritu Manufahi Arantes Izac Sarmento mos prekupa tebes ho komunidade nia rai tos ne’ebe grupu CPD-RDTL okupa.
“Ami kria ona dialogu ho CPD-RDTL. Maibe, iha dialogu komunidade husu ba CPD-RDTL atu la bele kontinua halo toos. Tanba rai komunidade nian tenke respeita” dehan Arantes ba Tempo Semanal iha Aldeia Loti suku Daisua area Luak.
Presidente Republika ho Vice PM mos prekupa tebes tanba komunidade sira nia rai CPD-RDTL okupa ho inisiativa hakarak kria koperativa no produs ai-han iha rai laran. Maibe, komunidade sira la aseita atu simu grupu CPD-RDTL . Ne’e duni, iha dialogu foin lalais ne’e, la hetan solusaun husi parte rua.
Hodi nune’e, Presidente Republika Taur Matan Ruak husu ba Ministeriu ESTATAL atu sai mediador ba problema ne’e. Tuir Vice Premeiru Ministru Fernando Lasama hateten, prosesu ne’e, lao hela no Presidente Republika ba hasuru rasik hodi husu halo dialogu. Agaora daudau situasaun iha ne’eba mos sei klama.
Ne’e hatudu katak, mensajen ne’ebe Presidente hato parte rua ne’e konsedeira no respeita. Saida mak akontese rai nain iha ne’eba la aseita no CPD-RDTL mos la koi atu sai husi fatin ne’e. Tanba, rai abandona hela sira mai atu halo tos. Iha momentu ne'e CPD - RDTL halo konsentrasaun bo'ot iha fatin refere atu halo kooperativas no serbisu daudaun halo kabubu atu sai natar iha rai sira ne'ebe durante ne'e populasaun sira husik de'it. "Ami mai iha ne'e atu halo kooperativa atu produz ai han iha rai ne'ebe maka la uza husi komunidade. Agora ami halo sira lakohi fali entaun ita nia espiritu nasionalizmu ne'e sei menus tan ba ita hakarak sosa de'it husi estranjeiru," dehan membru CPD-RDTL ida ba jornal ne'e.
Timor Leste sai dependencia maka'as ba importasaun inklui foos husi Thailandia ho Vietnam nune'e osan Dollar sai hotu fali ba estranjeiru maske Governu sosa tratores fahe lemo ona mos foos sei mai husi rai liur.
Husu kona ba oinsa atu buka solusaun ba asuntu ne’e, vice PM responde, “ita sei rona husi parte rua la bele fo hanoin ruma atu sai fali kontradis ho situasaun” tenik Lasama ba jornal Tempo Semanal bainhira remata nahe biti boot iha Aldeia Loti suku Daisua area Luak loron sabadu (24/11) distritu Fanufahi.
Nune’e mos kamondante distritu Manufahi Joao da Costa hateten, kestaun ne’e sira hatene desde sira mai prezensa iha sub-distritu Manu fahi. Iha dia 21 Presidente Republika Taur Matan Ruak no Vice PM Fernando Lasama ho ninia membru governu tomak halao dialogu ho parte rua. Maibe, la iha solusaun tanba diferensia idia. CPD-RDTL hakarak kontinua nafatin iiha ne’eba hala’o atividade agrikultura iha ne’eba no komunidade Fatu Berlihu tomak reziata total prezensa CPD-RDTL.
Ne’e duni, Presidente fo fali desizaun katak, sei forma ekipa ida husi komisaun atu rejolve bainhira sermonia remata halao kontinuasaun ba dialogu.“Agora daudauk, CPD-RDTL hala’o nafatin sira atividade hamos toos. Komunidade Fatu Berlihu paniku no la kontenti ho sira nia prezensa. Tanba, sira tauk CPD-RDTL barak iha ne’eba kuaze distritu sanulu resin tolu hare tauk. Maiske, sira nia prezensa” haktuir komandante Joao ba Jornal Tempo Semanal bainhira partisipa sermonia ritual iha ponte Aiasa loron sesta-feira (23/11) distritu Manufahi. (**)
No comments:
Post a Comment