Sunday 4 November 2012

Update Konfrontus Jovens Suku Kamea Jovens Rua Kapturadu no Xefe Aldeia Tolu Sofre


Tempo Semanal – Dili, 04/11/2012

Treinamentu membru PNTL sira kona ba
 atuasaun wainhira mosu  desturbiu
entre jovens sira (Photo Special)
Operasaun PNTL estasaun Bekora konsege kaptura jovens nain rua husi grupu sira ne’ebe ataka malu iha mota komarka kotuk no Xefe Aldeia tolu iha area refere hetan xamada maka’as husi PNTL atu resolve problemas sira ne’e. Se Ataka malu nafatin maka kaptura uluk maka xefe Aldeia sira nune’e aldei mos foti atuasaun maka’as ona hasoru jovens problematiku sira ne’e hodi kalan.

Hodi kalan mais ou menus liu oras kalan klaran iha grupu ida husi Bedois halo embuskada iha mota ninin parte leste hodi tuda uma populasaun besik mota ninin parte leste. Xefe Aldeia has Laran dona Natalina telefone ba ninia belun xefe aldeia husi Bedois ninian, hodi informa katak jovens husi Bedois halo provokasaun no tuda uma populasaun husi aldeia Has Laran ninian.

Xefe Aldeia husi Bedois mos koko hapara depois fila tiha jovens hirak ne’e sei tuda nafatin nune’e Xefe Aldeia Has laran ne’e dehan nia informa kedan ba PNTL estasaun Bekora. Tuir Observasaun PNTL kareta rua sa’e ba diresaun refere maibe grupu PNTL ida liu husi Terminal Bekora no grupu ida seluk tama husi jalan Garuda Has laran. Kareta PNTL tama iha Has Laran Kareta halai ho la ho lampu para besik iha mota sorin parte Has laran. La iha jovens ruma husi Has laran mak tuur iha dalan ninin maibe Xefe Aldeia mesak akompania ho populasaun ne’ebe ninia uma sai targetu ba fatuk husi grupu jovens Bedois mak halo hela relatoriu ba PNTL.

“Ami ho PNTL besik ba mota jovens husi Bedois lubun ida tuda PNTL sira nune’e maka PNTL sira duni tuir to’o ka’er jovens nain rua,” dehan Natalia, Xefe aldeia Has laran ninian.

Tuir informasaun ne’ebe jornal ne’e rekolla husi parte PNTL dehan katak antes ne’e PNTL estasaun Bekora halo ona aproximasaun hodi resolve  konflitus ne’ebe ninia abut mai husi domin entre jovens bairo rua ne’e maibe la konsege nune’e duni PNTL husu Xefe Aldeia Bedois, Ailele hun ho Has laran buka hakalma sira nia jovens. Maibe problemas tuda malu ne’e lakonsege hetan solusaun I hetook aat liu tan maka parte PNTL foo xamada de atensaun maka’as ida ba Xefe Aldeia sira ne’e.

“Ha’u mos tahan ruma fali entaun di’ak liu policia ka’er sira,” dehan Xefe aldeia Has laran no konfirma husi aldeia seluk.

Ho Hamnasa Xefe Aldeia ida informa katak jovens rua ne’ebe hodi kalan tuda PNTL ho populasaun ninia uma ne’e, “hmmmm sira lambe kedan masin no ha’u mos haree ha’u ta’uk.”


Kazu jovens Ataka entre jovens sira iha aldeia sira ne’e resulta uma lubun maka hetan estragus, ema balun kanek no animal balun mate tan ba jovens sira mos lasu malu ho monta lina eletricidade iha besik mota ninian komarka kotuk.

No comments: