Tilomár-Fohoren Hahu Hamnasa Ho Prezenca Ponte Boper

TEMPO SEMANAL - COVALIMA, 15/11/2012

 Sub-distritu Tilomár- Fohoren Sente Haksolok Tebes Ho Ponte Baer Ne'ebé hari Husi Governu.

Ponte Baer ne’ebe hari husi governu ho montante orsamentu U$ 6,321.652. 65 agora daudauk Komunidade sub-distritu Tilomar-Fohoren  Covalima utiliza ho kontente.

Kuaze –tinan barak komunidade sub-distritu Tilomár- Distritu Covalima iha tempu udan sira la bele hakur liu mota Baer ba sub-distritu Fohoren  no komunidade sira tenke hein oras ba oras too udan para no mota tun hafoin sira bele hakur liu mota ne’e.  Maibé, dezde Ponte  ne’e hala'o obra sira sente kontente. Tanba, tinan oin mai  ponte ne’e remata sira sei la hakur liu husi mota laran maibé liu husi ponte Baer ne'ebé hari husi governu.

Ho matan ne'ebé fihir husi komunidade Tilomár -Fohoren bainhira sira hakur liu husi mota Baer sempre hateke ba Ponte ne'ebé hari husi governu. Daudauk ne’e, sai dunik realidade tanba komunidade Tilomár-Fohoren lubun ida mós asiste diretamente iha inaugurasaun Ponte Baer ne'ebé partisipa mós husi governu. Komunidade  sente haksolok tebes tanba sira bele utiliza ponte Baer iha futuru.

“Governu foun, amigu foun, Ministru no staf  foun, responsabilidade estadu foun sei kontinua servisu hamutuk. Maibé,nu'udar emprezáriu timor-oan tenke fó kontribuisaun makas ba nasaun ne’e. Tanba dezenvolvimentu nu'udar kometimentu husi sidadaun hotu nian, la’ós responsabilidade husi governu de’it, maibé mós ba emprezáriu hotu” tenik diretór Gunung Kijang Óscar ba jornál Tempo Semanal bainhira partisipa iha inaugurasaun ponte Baer, iha Aldeia Rai-Hun Suku Bei-Seuk, Sub-Distritu Tilomár, Distritu Covalima foin lalais.

Diretór Kompañia Gunung Kijang ne'ebé kaer obra ne’e esplika katak, oinsá atu ema hotu-hotu bele asesu estrada, hodi nune’e  inan -aman sira ne’e, bele lori sira nia produtu lokál ba iha merkadu.
Kontribuisaun emprezáriu ba iha prosesu dezenvolvimentu sei hasoru problema barak hanesan difikuldade tékniku no finanseiru hodi limite emprezáriu sira atu bele realiza projetu ruma ne’ebé iha.
Tan ne’e, ita bele haluhan ba kotuk no hein katak bele mosu fali oportunidade foun atu bele dezenvolve rai ida ne’e. 

Iha serimónia inaugurasaun Ponte Baer Ministru Obras Públiku  Gastão Francisco de Sousa hateten, estrada iha timor laran tomak oras ne’e, sai problema boot. Tanba, realidade estrada barak mak sei aat. Tan ne’e, primeiru tenke hare uluk ninia prioridade tanba  rekursu finanseiru limitadu no iha Ministériu refere ema menus. Oinsá bele desentraliza servisu ba iha distritu. Ne’e duni, prioridade iha tinan 2013 tenke hadi'a estrada hirak ne’e.

“ Tempu badak, sei tau tékniku iha distritu no rejionál. Nune’e mós tau diretór ho ninia tékniku ida hodi bele hare servisu Obras públiku iha distritu. Planu hirak ne’e, depende ba iha Parlamentu Nasionál tanba sira mak sei diskute no aprova orsamentu” haktuir Ministru Obras Públiku  ba jornál Tempo Semanal  iha Aldeia Rai-Hun Suku Bei-Seuk, Sub-distritu Tilomár.

Ministru mós hateten, governu sei ateru estrada husi Sub-Distritu Zumalai mai to’o iha Suai atu povu sira bele asesu no lori produtu ba merkadu Covalima. Ne’e duni, preokupasaun husi populasaun distritu refere kona ba ponte ne’ebé liga estrada Nasionál.

Nune’e mós Ana Paula  Dos Santos hanesan komunidade Fohoren ne'ebé durante ne’e, hala’o estudu  iha   Universidade Nasionál Timor-Lorosa’e (UNTL) partisipa mós iha serimónia inaugurasaun Ponte Boer hateten, sira sente haksolok tebes ho ponte ne'ebé hari husi governu. Tanba bele ajuda sira nia inan-aman lori produtu lokál husi Sub-distritu Fohoren ba fa’an iha kapitál distritu Suai no transporte públiku bele tama iha sira nia hela fatin.  (**)