Saturday 10 November 2012

MP Hatun Termus De Residencia Ba Jornalista Nelio Triste


Tempo Semanal - Dili, 10/11/2012

Jornalista Raimundo Oki 
Ministeiru Publiku (MP) foo termus de residencia ba jornalista Oscar husi diario STL ho Raimundo Oki husi jornal independenti tan ba alegasaun hatun noticia ne’ebe hafoer naran prokurador ida husi Ministeiru Publiku iha oekuse nune’e sekretariu do estadu ba asuntus Komunikasaun social, Nelio Isac sente triste no prepara atu aijuda jornalista sira ho defensor.

Nelio Isac hateten katak ninia parte sempre respeita ba independencia judicairio iha prosesu hasoru jornalista nain rua ne’e maibe triste tan ba ministeiru publiku seidauk uza mekanizmu mak hatuur ona iha lei mak sei vigora hela iha nasaun ne’e.

“Ha’u triste tan ba loloos Ministeiru publiku uza lai lei ne’ebe Indonesia ninian ne’ebe foo sira direitu atu resposta hanesan hatur ona ne’ebe sei uza hela iha nasaun ne’e,” dehan Nelio Isac, Sekretariu do Estadu ba Komunikasaun Social.

Jornalista ida husi STL no ida seluk husi jornal Independenti daudaun ne’e hetan termus de residencia no notifikadu hanesan arguido ba noticia ne’ebe hanesan hasoru prokurador ida iha Oekuse. Iha noticia ne’ebe publika husi jornal Diario rua ne’e mosu alegasaun husi familias vitima sira hasoru prokurador ida.

Kazu ne’e mosu tan ba insidenti trafiku ida ne’ebe hamate ema nain tolu to'o ohin seidauk iha justica tan ba iha prosesu ninia klaran suspeitu halai tiha ba Indonesia nune’e duni tuir publikasaun iha Jornal rua ne’e relata familias vitima sira nia deskonfianca hasoru prokurador ida ne'ebe kaer kasu refere iha oekuse.

Iha Parte seluk Jornalista sira lamenta ho notifikasaun ba jornalista nain rua ne’e tan ba loloos prokuradoria da Republika notifika ba redasaun husi jornal rua ne’e se karik noticia la kompletu ka hamosu kalunia ruma la’os ba individu.

“Ha’u hanoin Ministeiru publiku devia notifika maka jornal rua ne’e tan ba sira maka publika noticia maske jornalista sira maka hakerek ne’ebe tuir ha’u nia hanoin ministeiru publiku seidauk kompriende servisu jornalizmu ninian,” dehan jornalista ne’ebe husu atu jornal ne’e foo sai ninia naran.

Iha parte seluk tuir informasaun ne’ebe TS hetan husi jornal STL ho Independenti dehan sira nia parte mos hakfodak wainhira Ministeiru publiku notifika jornalista sira maibe sira hahu ona kolabora hodi ba hatoo informasaun iha Ministeiru Publiku.

No comments: