Saturday 10 November 2012

Komunidade Bobonaro Husu Aumenta Seguransa Iha Fronteira




FOHO LOELAKO iha distritu bobonaro
TEMPO SEMANAL - BOBONARO, 19/11/2012

PROBLEMA-ne'ebé sempre akontese iha Lina fronteira komunidade Distritu Bobonaro husu ba governu atu reforsa seguransa. Tanba hare membru PNTL ne'ebé servisu iha distritu Bobonaro númeru mínimu atu bele kontrola fronteira iha área Bobonaro.

“ita hare misaun UNMIT hela  fulan ida ramata no UNPOL mós entrega servisu seguransa ba Instituisaun rua toma responsabilidade hodi hare situasaun iha rai laran. Ne’e duni Governu tenke buka meius oinsá aumenta membru PNTL liu-liu membru Unidade Patrolia Fronteira (UPF) ne'ebé servisu iha baliza ” tenik komunidade sub-distritu Lolotoe Florindo de Jesus ba Jornál Tempo Semanal  iha nia hela fatin.

Kestaun ne’e, sai mós preokupasaun ba administradór Sub-Distritu Maliana Adelino Brito Goveia hateten, maiske misaun UNPOL entrega podér seguransa tomak ba governu Timor-Leste, liu-liu ba PNTL no F-FDTL atu toma responsabilidade seguransa iha Nasaun ne’e.

“Ami husu ba governu atu reforsa tan membru PNTL ne'ebé agora daudaun ho númeru ne'ebé ki'ik servisu iha Lina fronteira.  Ne’e duni presiza aumenta tan membru UPF hodi kontrola Lina fronteira.”dehan Adelino ba Jornál Tempo Semanal foin lalais.

Sub-administradór ne’e mós apela ba povu Bobonaro tenke fó kolaborasaun ba Instituisaun PNTL no F-FDTL hodi bele fó seguransa ne'ebé di'ak ba Nasaun Timor-Leste (TL). Tanba agora daudaun UNPOL entrega podér seguransa ba governu.

Ne’e duni, tenke fó kontribuisaun  ba malu  oinsá situasaun seguransa bele la’o iha ita nia leet. Atu nune’e dezenvolvimentu iha país ne'e, la’o ho susesu. Tanba povu ne'ebé hela iha Lina fronteira hanesan odamatan boot, nasaun TL presiza fó apoiu seguransa ne'ebé makas hodi bele moris hakmatek.

Nune’e mós xefe suku Holsa Antonio Santa Cruz preokupa kona ba seguransa iha rai laran ne'ebé UNPOL entrega servisu seguransa ba governu TL. “Ita nia PNTL sira tenke servisu makas ba área seguransa nia oinsá mak povu TL bele moris iha situasaun ida ne'ebé di'ak liu-liu povu ne'ebé moris iha Lina baliza sira presiza seguransa ne'ebé metin hodi nune’e bele kontrola hotu área Lina fronteira” hakotu xefe suku ne'e. (**)

No comments: