Tuesday 20 November 2012

MDS Foo Ultimatun Ba Joventude Problematiku

Tempo Semanal - Dili, 20/11/2012

Ministru Defesa no Seguransa RDTL, Xanana Gusmao dehan joventude sira ne'ebe halo problema tuda malu nia sei haruka ka'er no kastigu sei la foo han.

Xanana hateten lia fuan sira ne'e iha aeroportu Komoro depois de fila husi vizita ba estranjeiru.



Eis lider resistencia ne'e dehan nia la tauk wainhira Tribunal internasional atu kondena nia tan ba halo violasaun direitus umanus. Iha konferencia de Imprensa Xanana mos foo hanoin ba parte hotu-hotu inklui sociedade civil katak direitus Umanus la'os de'it atu livre ko'alia ka manifesta de'it.

Tuir Xanana katak Nasaun dezenvolvidu sira sempre hakilar Direitus umanus maibe iha ema barak maka sei mate hamlaha no dala barak liu hatudu liman ba nasaun ki'ik sira maibe kuandu wainhira iha nasaun bo'ot sira ne'e ema barak lakon direitu ba servisu maka halo manisfestasaun sira hodi polisia baku to'o dolar maibe lider nasaun sira ne'e dehan fali razaun seguransa nasional.

Xanana hateten dala ruma Asia Watch kritika nasaun ki'ik sira wainhira mosu problema ki'ik ruma.

Antes hasai lia fuan ne'e Xanana mos halo apellu ba Joventude sira atu hado'ok a'an husi uzu droga tan ba bele estraga futuru nasaun sira nia moris. Tuir Xanana hateten katak wainhira joventude balun dependenti ona ba uzu ai moruk droga maka sei susar hanesan izemplu balun katak joventude Timor oan balun hahu uza droga no latauk inan aman hodi baku rahun kofre ninia aman ninian.


No comments: