Saturday 10 November 2012

Konflitu Entre Joven Iha Merkadu Zumalai vendedór Sai Vítima


Tempo Semanal - Suai, 10/11/2012

AKOTESEMENTU- iha merkadu Zumalai halo inan-aman sira ne'ebé durante ne’e lori sira nia produtu lokál ba iha merkadu hodi bele hetan netik osan sentavus ida. Maibé, iha loron ne’e, produtu lokál inklui mós sasan kios hetan estragus.

Konflitu entre joven hodi rezulta ema na'in rua (2) hetan kanek. Hodi nune’e  komandante PNTL distritu Kovalima hatún orden ba komandante operasaun eskuadra Zumalai ho ninia membru hala’o atuasaun diretamente ba joven ne’ebé kria konflitu .

“Bainhira hala'o kapturasaun, ha'u  kontaktu diretamente  ba Ministériu Públiku hodi hato'o informasaun kona ba kazu refere.  Ne’e duni, suspeitu sei hela nafatin iha sira nia hela fatin” esplika  komandante Distritu Kovalima  Antonino Mau Luta ba Jornal  Tempo Semanal iha Zumalai.

Antonino hatutan, akontesimentu ne’e, husi parte polisia rasik hare ho matan suspeitu na'in  rua ne'ebé kria konflitu hafoin  kaer sira no  balun  entrega an ba iha polisia. Kazu refere sei iha hela prosesu investigasaun husi parte polisia no sei aplika TIR ba sira. Atu nune’e sira bele koopera hamutuk hafoin lori sira ba iha Ministériu Públika.

Agora daudauk, suspeitu na'in rua polisia husik livre. Maibé, polisia sei esforsu nafatin no hein orden husi Ministériu Públiku hafoin hala’o fali kapturasaun ba sira. “Akontesimentu ne’e, ema na'in rua hetan kanek. Problema ne’e, individuál la’ós grupu” Komandante distritu Kovalima esplika kona ba akontecimentu ataka malu ne'ebe mosu iha hikas Zumalai semana kotuk.

Tuir observasaun korrespondente jornál Tempo Semanal katak, iha akontesimentu ne’e, estraga vendedór nian sasan ne’ebé fa’an iha merkadu Zumalai. Ne’e duni kuaze vendedór ne'ebé fa'an sente triste. Tanba, baku balu entre joven halo sira ninia sasan hetan estragus.

Konflitu entre jovens iha area ne'ebe iha tinan kotuk hamate ema balun no uma barak maka hetan estragus no sunu husi gropu sira ne'e. (**)

No comments: