Xanana Hahi PNTL No Foo Ultimatum ba Jovens Sira mak Involve Problema

Tempo Semanal - Dili, 19/11/2012

PM Xanana hatudu liman ba drug dealer sira
 iha kuatel jeral PNTl (foto file TS/Dilma)

Primeiru Ministru Kay Rala xanana Gusmao ne’ebe fila hikas mai Timor Leste ohin depois de loron sanolu ba tuir programa sorumtuk forum demokrasia bali ne’ebe organiza husi preisenti SBY depois ba participa iha enkontru G7+ iha Haiti dpois fila hikas mai Bali participa iha kazamentu Ministru transporte no telekomunikasaun Pedro Lay ninian iha sabado semana kotuk.

Besik tuku 14:00 PM Xanana to’o hikas iha dili ho aviaun Merpati ne’ebe simu husi Vice PM, Fernando Lasama de Araujo ho membru do governu sira seluk. Hafoin kaer liman ho formatura naruk husi membru do governu sira PM Xanana ba liu jedan sala VIP hodi hetan briefing ruma husi membru governu balun.

Liu tiha ne’e PM ba halo konferencia de imprensa ne’ebe PM ko’alia kona ba objetivu principal husi sorumutuk Bali ho Haiti (TS sei transkrivu hela no sei hatun kompleta iha tempu badak).

Hafoin PM hakatk liu ba haree suspeitu trafiku droga ne’ebe kaptura husi Autoridade Timor Leste ninian. Suspeitu nain rua ne’e kaptura hamutuk ho droga KOKAIN liu kilo lima (la’os Heroin ) tan ba depois halo testing iha laporatoriun hatudu katak droga ne’e kokain.

Sidadaun Indonesia feto ida ho mane ida ne’ebe koko atu lohi autoridade sira ne’e ikus mai metin duni tan ba sira hatama kokain pakete rua iha revista feto sira nian. Tuir provas ne’ebe iha hatudu katak kurir droga kokain nain rua ne’e sidadaun Indonesia mane ida no feto ida hanesan publika ona iha breajking news ts.

Xanana hahi esforsu husi membru PNTL sira ne’ebe konsege hatudu sira nia kbiit hodi hetan aktu ilicitu sira ne’e. “Ita mos bele,” dehan PM xanana.

Xanana  rekuinese katak ninia nasaun sai hanesan fatin tranzitu droga ninian antes lori fali ba Indonesia no iha posibilidade mos ba liu fali Australia.

Iha okaziaun ne’e mos PM Xanana dehan jovens balun ne’ebe uza droga too haluha aan hodi sobu ninia pai nia kofre. Iha momentu hanesan Xanana hanesan Ministru Defesa no segurancaaviza atu jiovens sira atu labele tuda malu tan.

“Se tuda malu ha’u haruka ka’er no labele fo’o han,” dehan PM Xanana ba jornalista sira depois de vizita ba fatin ne’ebe Suspeitu HH sulan ba iha Aeroportu Nicolao Lobato.

Ministru Defesa no seguranca ne’e dehan nia sei la tauk wainhira ema kondena nia halo violasaun ba direitu umanu tan ba la foo han ema sira ne’ebe involve iha problema baku malu no tuda malu.

“Ha’u mak ne’e no ha’u pronto atu ba hatan,” dehan xanana.