Saturday 10 November 2012

Estudante Barak Sei Tuur Iha Rai


TEMPO SEMANAL - DILI, 10/11/2012

TINAN barak ona Estudante husi eskola Primaria Belako Suku Rai Mea,Sub-Distritu Zumalai Distritu Covalima la iha kondisaun di’ak. Tanba, besik tinan lima ona futuru jerasaun Timor-Leste ne’ebé estuda iha eskola refere tuur de’it iha rai. Pior liu tan meza no kadeira ba mestri sira la iha.

Imajen eskola sekundaria ida iha
Bekora mak hanesan nee (Foto TS special)
Situasaun hanesan ne’e kuaze akontese iha fatin barak, inklui eskola balun iha kapital nasaun Timor-Leste, liu-liu eskola sira iha area rurais. Realidade ida ne’e akontese daudauk ba eskola primaria Belako Distritu Kovalima, tanba to’o ohin loron eskola refere la iha fasilidade ne’ebe sufesente, hanesan kadeira no meza. La’os ne’e de’it, eskola refere ninia kondisaun aula mós la sufesente ona atu hala’o prosesu aprendizajen iha laran. Tanba, kalen balun komesa kuak, plafon dodok hotu ona, la iha janela no odamatan.

“tinan lima ona ha’u nia estudante sira sei tuur de’it iha rai hodi simu meteria husi mestri sira. Tanba, la iha kadeira no meza. Nune’e mós, aula ne’ebe mak estudante sira uza la iha kondisaun di’ak , kadeira no meza ba mestri sira mós la iha, ne’e duni iha oras aula nian mestri sira hamrik de’it mak hanorin” dehan Diretor Eskola Primaria Belako, Armindo Amaral ba Jornal Tempo Semanal iha ninia hela fatin.

Tuir nia, problema menus fasilidade la’os akontese de’it iha sira nia eskola fatin. Maibe, problema hanesan ne’e akontese mós ba eskola Primaria, Pre-Sekundaria no eskola Sekundaria balun iha Distritu Kovalima.

Ho laran triste ulun boot eskola primaria Belako esklarese katak, kestaun hirak ne’e sira hato’o dala barak ona ba Departamentu Edukasaun Distritu  Kovalima. Maibe, ate agora seidauk hetan resposta ruma. “problema ne’ebe ha’u estudante sira enfrenta ha’u sempre hato’o bebeik ba diretor Edukasaun Distritu Kovalima, maibe sira dehan hein deit no to’o ohin loron seidauk iha mudansa” tenik Diretor ne’e hodi taka ninia liafuan.

Tuir Carlito Magno, nu’udar estudante nia sente triste ho situasaun ida ne’e, maibe tanba hakarak atu hetan matenek entaun obrigasaun ba sira tenke simu realidade ne’ebe iha hodi tuur  de’it iha rai para simu materia husi mestri sira.

Estudante ne’e mós rekoinese katak, ambiente eskola ne’e la favoravel ba sira atu estuda ho diak.  Ne’e duni, sira husu ba Governu espesialmente ba Ministeriu Edukasaun tau konsiderasaun  ba problema ne’ebe mak oras ne’e daudauk sira hasoru, liu-liu oinsa bele fasilita kadeira, meza no hadia lalais kondisaun eskola ne’ebe at.

“Ami hakarak husu ba Menistriu Edukasaun atu hadia eskola hirak ne’ebe aat, hodi nune’e ba jerasaun tuir mai labele tan hasoru problema hanesan ne’e.” estudante ne’e suzere.

Nune’e mós, Manuel Lopes aman husi estudante hateten, kada tinan Estadu aprova osamento ba Menisteriu Edukasaun iha ou lae..? Tanba escola ida ne’e harii besik tinan lima ona, mais estudante sira nafatin tuur iha rai hodi tuir prosesu aprendizajen.

Nu’udar aman ne’ebe iha responsabilidade moral hodi fó eskola ba ninia oan, Manuel Lopes kestiona katak, tanbasá governu kria tia politika kona ba eduasaun gratuita maibe la iha kualidade? .
Iha parte seluk, Xefe Suku, Rai Mea Jorge Lopes hateten” escola ida ne’e liman rohan Indonesia nian no iha tempu ukun an kontinua loke fila fali ba povu nia oan sira atu sira bele buka aprende iha escola ida ne’e.

Klaru katak, kondisaun eskola ne’e agora daudauk ladiak ona, kalen sira dook hotu, lai sira monu hotu ona, janela no odamatan la iha. maibe, husi parte Governu liu-liu Ministeriu ne’ebe kompotente seidauk mai hare. Ne’e duni, halo povu nia oan sira tenke tuur nafatin iha rai.

“dala barak hau mos ha’u hato’o ba nai ulun sira kona ba kondisaun escola ida ne’e maibe nunka iha resposta” dehan Xefe Suku ne’e hodi hateten, la’o deit escola ida ne’e mak aat maibe situasaun hanesan ne’e akontese mos iha fatin balun.

Liu husi biban ida ne’e, ulun boot Suku Rai Mea  hakarak husu ba kintu guvernu liu husi Menistru Edukasaun foun bele rezolve problema ida ne’e. (**)



No comments: