Thursday 8 November 2012

Dili Hiit Taxa Jogu Juvenil Husi Distritu Lima


Tempo Semanal - Dili, 08/11/2012

DILI sai vencedor iha jogu ne’ebe hola parte husi klubu hitu iha Dili ne’ebe hetaan apoiu husi Sekretaria do estadu juventude Desportu, Embaixada korea ho ajencia Koica. Sekretariu do estadu Juventude Desportu, Miguel Manitelo dehan objetivu husi jogu ne’e atu buka hatene kbiit foin sa’e sira ne’ebe durante ne’e hola parte iha eskola bola iha distritu lima iha TL no hein katak federasaun futebola Timor Leste bele hili mos oan Timor husi Distritu hodi representa nasaun RDTL iha kompetisaun internasional ruma la’os de’it husi Dili.

“Primeiru ita haree katak eskola ita loke iha distritu lima maibe labarik sira nee treina la iha kompetisaun ruma. Dala ruma sira mos bele sai baruk tan ba treinu maibe la iha kompetisaun,” dehan Miguel Manitelo.

“Ha’u hanoin liu husi jogus sira ne’e ita promove daudaun talent sira ne’ebe ita alin kiik oan sira ne’e iha I espera katak liu husi jogu sira ne’e mos ha’u fiar katak federasaun bele haree no iha selesaun ba jogus ruma sub 12 ka sub 16 alin sira ne’e balun bele involve. Tan ba ita dala barak jogadores sira ne’ebe sai ba liur ka selesaun nasional ne’ebe sai liur, barak liu Dili nia oan maka tuir. Nune’e duni jogu sira ne’e bele promove I bele mos foo oportunidade atu ita deside hodi hili sira ne’e balun tama iha ekipa nasional,” nia esplika.

Tuir Miguel katak liu husi atividade ne’e atu hametin amizade entre foin sa’e oan timor sira ne’e.

“Jogus entre klubu husi distritu lima ne’e hodi halo jovens sira mos bele hasoru malu hodi hametin amizades entre foin sa’e sira ne’e,” Miguel espera.

Jogu ne’e iniciativa hahu husi treinador koreanu ida ne’ebe kleur ona iha Timor Leste ne’ebe halo kontribuisaun maka’as ba dezenvolvimentu futebola nasaun mak hetaan apoiu husi Sekretariu do Estadu Juventude ho ajencia Koica. “Hetan mos apoia husi embaixada korea no ajencia dezenvolvimentu Korean nian ho naran Koica I orsamentu total ba realizasaun nee husi Sekretaria do estadu” informa Miguel Manetelo.

Miguel Manetelo dehan participasaun iha kompetisaun ne’e mai husi de’it klubu sira iha distritu lima hanesan Dili, Lauten, Maliana, Suai ho Baukau tan ba limitasaun kbiit orsamentu. “Tan ba ho kbiit ne’ebe ita iha, ita foin maka loke eskola sira ne’e iha distritu lima,” Manitelo konfesa

Maibe nia promote katak se iha orsamentu tan maka iha tinan oin sei bele aijuda nia atu habelar tan eskola bola nian iha distritu balun ne’ebe besik iha capital nasaun TL hanesan iha distritu Manatutu, Aileu ho Likuica.

No comments: